Read kinyarwanda Yobu 21 Bible Online

Yobu 21 - kinyarwanda bible

Yobu 21

¹Yobu afata ijambo[31], agira ati

²«Mutege amatwi, mwumve amagambo yanjye, ni cyo cyiza mwankorera.

³Mureke kunca mu ijambo, maze nimara kuvuga mubone kunseka.

⁴Ese mwagira ngo uwo ninuba ni umuntu? None se ubwo nabuzwa n’iki kurambirwa?

⁵Nimuhindukire mundebe, murumirwa, maze mwifate ku munwa.

⁶Iyo mbitekereje, nshya ubwoba, umubiri wanjye ugahinda umushyitsi.

⁷Ni kuki abagome bagira ubugingo, kandi bagasaza, n’ubukire bwabo bukiyongera?

⁸Dore urubyaro rwabo rurakomera, n’abuzukuru babo bakagwira,

⁹ingo zabo zikabaho mu ituze, nta kibateye inkeke? Ibihano by’Imana ntibibageraho;

¹⁰ibimasa byabo birororoka, n’inka zabo zibyara zitaramburuye.

¹¹Bareka abana babo bakiruka nk’imitavu, ugasanga ibitambambuga byabo byikinangura.

¹²Batambira inanga n’ingoma, kandi bagatega amatwi ijwi ry’umwirongi.

¹³Barangiza ubuzima bwabo mu mutekano, bakajyanwa ikuzimu mu mahoro.

¹⁴Nyamara kandi babwiraga Imana bati ’Have igirayo, ntidushaka kumenya inzira zawe!

¹⁵Nyir’ububasha se ni iki ngo tumugaragire, ese twakunguka iki tumutakambiye?’

¹⁶Umukiro wabo ni bo bawigengaho, naho Imana bakayihigika mu migambi yabo.

¹⁷Hari uwakunze kubona itara ry’abagome rizima, cyangwa amakuba abagwirira? Ni kangahe Nyir’ububasha arakara akabaterereza ibyago?

¹⁸Bameze se nk’akatsi gahuhwa n’umuyaga, cyangwa umurama utwawe na serwakira?

¹⁹Naho mwe ngo ’Imana izabahanira mu bana babo!’ Icyaruta si uko yabihanira ubwabo, na bo bakireberaho!

²⁰Bityo umugome akabona ibye bicika, akanasogongera ku burakari bwa Nyir’ububasha!

²¹Urugo rwe ruba rukimubwiye iki, atakiriho, iyo yamaze gukuramo ake karenge!

²²None se, Imana ni yo igiye gutozwa ubwenge, kandi ari yo icira urubanza ibikomerezwa byose?

²³Hari upfa akindutse agifite imbaraga ze zose, kandi atunze, atunganiwe,

²⁴ashishe ku mubiri, n’umusokoro ucyorohereye mu magufa ye.

²⁵Hari n’undi upfana agahinda, atanigeze ihirwe na rimwe.

²⁶Abo bombi ariko, bahambwa mu gitaka! inyo zikabashokera icyarimwe!

²⁷Ni koko, ibitekerezo byanyu ndabizi, nzi n’ibyo muntekerezaho byose mundemera.

²⁸Muribaza muti ’Ya nzu y’igikomangoma iri he? Rya hema ry’abagome rishinze hehe?’

²⁹Ese ntimujya mubaza n’abagenzi, cyangwa mwaba muhinyura ibyo bavuga?

³⁰Iyo amakuba yateye umugome ararokoka, ku munsi w’uburakari, akarusimbuka.

³¹Ni nde se umucyurira amafuti ye? Ibyo yakoze se, ni nde ubimwihimura?

³²Bamujyana mu irimbi, imva ye bakayirinda;

³³ubutaka bwo mu mucyamu bukamworohera, imbaga nyamwinshi ikamuherekeza, abantu batabarika bakamugenda imbere.

³⁴Ni kuki mwiha kungira inama z’amahomvu? Ibisubizo mumpa, ni ukunkina ku mubyimba.»