Read kinyarwanda Yobu 23 Bible Online

Yobu 23 - kinyarwanda bible

Yobu 23

¹Yobu afata ijambo[33], agira ati

²«Nanone, amaganya yanjye arakomeye, ukuboko kwa Nyir’ububasha kurankandamiza, nkaboroga.

³Ni nde uzamunyereka, akangeza aho atuye!

⁴Navugira akababaro kanjye imbere ye, nkamubwira ingingo nshingiyeho,

⁵bityo nkamenya amagambo yansubiza, nkumva neza icyo ambwiye.

⁶Ese hari icyamuvuna mu kujya impaka nanjye? Oya, yapfa kuntega amatwi gusa;

⁷akumva ukuntu uwo baburana avuga ukuri, maze urubanza rwanjye nkarutsindira burundu!

⁸Ariko, iyo mushakiye iburasirazuba, simubona, mu burengero bwaryo na ho, simpamusange;

⁹mushakishiriza mu majyaruguru, simuce iryera, nagana epfo na ho, simpamubone.

¹⁰Nyamara we azi uko merewe; ashatse yanyuza mu itanura, navamo nsa na zahabu iyunguruye.

¹¹Nashinze ibirenge byanjye mu ntambwe ze, mboneza inzira ye nta kuyoba;

¹²sinigeze nanga amategeko yampaye, kandi nzirikana mu mutima amagambo yambwiye.

¹³Ariko ni we utegeka, kandi nta we umuvuguruza, icyo yiyemeje, aragikora.

¹⁴Nanjye, azangenzereza uko yabigennye, kimwe n’indi migambi yose yifitemo!

¹⁵Iyo ni yo mpamvu ituma nshya ubwoba imbere ye, maze uko mbitekereza, nkarushaho guhinda umushyitsi.

¹⁶Imana yanciye intege, Nyir’ububasha yankuye umutima;

¹⁷kuko ikinshengura, atari umwijima ndimo, cyangwa ibihu byugarije amaso yanjye.