Read kinyarwanda Yobu 28 Bible Online

Yobu 28 - kinyarwanda bible

Yobu 28

¹[35] Koko rero, feza igira aho icukurwa, zahabu na yo igira aho itunganirizwa;

²ubutare babukura mu butaka, babucanira, bukabyara umuringa.

³Bacukura bitwaje amatara agahashya umwijima, maze ibuye ryari ryihishe mu mwijima w’igicuku, rikagaragara ryose uko ryakabaye.

⁴Imbaga y’abacakara bacukuye amarongi ahantu hadatuwe, bayajyamo bamanukiye ku kiziriko, kibakoza hirya no hino nta muntu ubareba.

⁵Ubutaka bwera ibitunga abantu, ariko mu nda yabwo umuriro uhinda.

⁶Aho hantu hari amabuye y’agaciro, arimo na zahabu nyinshi!

⁷Ni inzira ibyaruzi bitazi, emwe na kagoma ntiraharabukwa!

⁸Inyamaswa z’ishyamba ntizirahagera, habe ngo n’intare irahazi.

⁹Amasarabwayi yarajanjaguwe, imisozi irarimbagurwa,

¹⁰urutare barucishaho imiyoboro, maze ibintu by’agaciro byose, umuntu arabibona.

¹¹Bashakiye no mu masoko y’imigezi, ibyihishe byose bishyirwa ahagaragara.

¹²Ariko se ubuhanga, bwo bukomoka he? Indiri y’ubwenge iba he?

¹³Umuntu ntazi inzira ibuganishaho, kandi nta bwo buri kuri iyi si y’abazima.

¹⁴Inyenga iravuga iti ’Nta bwo bundimo!’ n’inyanja na yo iti ’Nta bwo buba iwanjye!’

¹⁵Nta bwo buguranwa zahabu iyunguruye, kandi ntibunagurwa uburemere bwa feza.

¹⁶Nta n’uwabugereranya n’amabuye y’agaciro, nka zahabu y’i Ofiri cyangwa safiri.

¹⁷Ni byo, nta ho buhuriye na zahabu cyangwa amasaro, nta n’uwabugurana igikombe cya zahabu.

¹⁸Nta ho buhuriye n’amabuye y’agaciro, kandi kubugira biruta gutunga ibirezi.

¹⁹Ntibugereranywa na topazi yo mu Misiri, kandi nta ho buhuriye na zahabu iyunguruye.

²⁰Ariko se noneho, ubuhanga bukomoka he? indiri y’ubwenge ni iyihe?

²¹Bwihishe amaso y’umuntu wese, n’inyoni zo mu kirere ntizibuzi.

²²Inyenga y’ikuzimu yarivugiye iti ’Twigeze kumva babuvuga baburata.’

²³Imana yonyine ni yo izi inzira yabwo, kandi ikamenya aho buba,

²⁴kuko ibona hose kugeza mu mpera z’isi, kandi ikitegereza ibiri mu nsi y’ijuru byose.

²⁵Igihe yahaga umuyaga imbaraga ufite, ikagenera amazi urugero rwayo,

²⁶igihe yahaga imvura amategeko ayigenga, igaca n’inzira y’imitontomo y’inkuba,

²⁷icyo gihe, ni ho yabubonye, irabucengera, irabushima, kandi ibusuzuma impande zose,

²⁸maze ibwira umuntu, iti ’Gutinya Nyagasani, ni bwo buhanga, kandi kuzibukira icyaha, ni bwo bwenge.’