Read kinyarwanda Yobu 30 Bible Online

Yobu 30 - kinyarwanda bible

Yobu 30

¹None dore nsigaye nsekwa n’abo nduta ubukuru, kandi ba se narajyaga mbakerensa, nkumva basumbwa n’imbwa zindindira amashyo.

²None se amaboko yabo yari kumarira iki? Ko imbaraga zari zarabashizemo,

³kubera ubutindi n’inzara. Babaga mu bigunda, ahantu h’itongo harariranye;

⁴basaruraga imbuto zo mu ishyamba, bagatungwa no guhonda inguri.

⁵Bari ibicibwa mu bantu, basigaye babakwena nk’ibisambo.

⁶Bararaga mu mihora, mu buvumo cyangwa mu bikuku by’urutare;

⁷bakagongerera mu bihuru, bakirundanya mu bitovu.

⁸Bari abana b’inyoko mbi, babyawe n’abatagira izina, bari ibicibwa mu gihugu cyose.

⁹None basigaye barantereyeho imbyino, nababereye iciro ry’imigani!

¹⁰Nsigaye mbatera isesemi bakampunga, kandi ntibatinya kuncira mu maso.

¹¹Umuheto wanjye, Uhoraho yarawureguye, arandibata, none bose barambonerana.

¹²Iburyo bwanjye nugarijwe n’ingegera, zishakisha uburyo zantembagaza.

¹³Barantangatanze, bambuza ubuhungiro, baraje, kandi nta we ubakoma imbere;

¹⁴baciye icyuho kigari bangeraho, nuko bankumbagaza mu byavu.

¹⁵Ubwoba bwarantashye, amizero yanjye yose atumuka nk’umuyaga, umukiro wanjye uyoyoka nk’igicu!

¹⁶None umutima wankutse, iminsi y’ubutindi iranyokamye.

¹⁷Nijoro, ububabare bumunga amagufa, n’imitsi yanjye ikarega yose.

¹⁸Uhoraho yanshikuje umwambaro wanjye, anigisha igishura cyanjye mu ijosi,

¹⁹ankumbagaza mu cyondo, none ndasa n’uwaraye mu ivu cyangwa mu mukungugu.

²⁰Uhoraho, ndagutakambira ntunyumve, nakwiyereka, ntunyiteho.

²¹Wambereye gica, uranyibasira n’imbaraga zawe zose,

²²wambagayuje serwakira, irancundagura, maze ndigitira muri iyo nkubi y’umuyaga.

²³Ni byo ndabizi, uransubiza mu rupfu, aho abazima bose bazahurira.

²⁴Ariko se abakene sinabateye inkunga, igihe ubutindi bwabugarizaga bakantakira?

²⁵Ese sinagiriye impuhwe uwo ubuzima bwari bukomereye, umutima wanjye ukaririra umukene?

²⁶Nari niteze umukiro, amakuba aba ari yo ansanga, nari nizeye urumuri, umwijima uba ari wo unsanga.

²⁷Amara yanjye aragonga ubutitsa, iminsi y’amakuba yaranziye.

²⁸Ndagenda nijimye, nta mucyo, mu ruhame, ndahaguruka ngasakuza,

²⁹nabaye ruhabwanduru nk’umuhari, nibera mu butayu hamwe na za mbuni.

³⁰Umubiri wanjye warirabuye, amagufa yanjye yashiririjwe n’umuriro w’amaseke.

³¹Inanga yanjye isigaye ari iy’amaganya gusa, naho umwirongi wanjye ugaherekeza amajwi y’abandirira.