Read kinyarwanda Yobu 31 Bible Online

Yobu 31 - kinyarwanda bible

Yobu 31

¹Amaso yanjye, twari twarumvikanye, ko atagomba kugira inkumi arangamira.

²None se uruhare Nyir’ijuru aha abantu ni uruhe? Ni uwuhe mugabane Nyir’ububasha abagenera?

³Aho none si amakuba abahemu bagabana, n’inkozi z’ibibi si akaga zigenewe?

⁴Ese ntabona imyifatire yanjye, kandi akabara n’intambwe nteye zose?

⁵Niba narabaye umunyabinyoma, nkaba naragenzwaga no kubeshya,

⁶Imana ninsuzume uko bikwiye, maze imenyereho umurava wanjye!

⁷Niba narayobye inzira nyayo, umutima wanjye ugatomerera aho amaso awujyanye, none nkaba narahindanye ibiganza,

⁸ndabirahiye: nzabibe rubanda rwirire, n’urubyaro rwanjye ruzarimbuke!

⁹Niba umutima wanjye warararukiye umugore w’undi, ngahora ndekereje ku rugi rw’umuturanyi,

¹⁰ndabirahiye: umugore wanjye azace incuro ku wundi, maze abandi bamwitungire!

¹¹Koko rero, iryo ni ishyano naba narakoze, ndetse ni icyaha gikwiye gucirwa urubanza,

¹²cyamviramo umuriro wantwika ukandimbura, ugakongeza umusaruro w’ibyo nejeje byose.

¹³Niba narakandamije umugaragu wanjye, nkarenganya umuja wanjye hari icyo dupfa,

¹⁴ubwo se nzabigenza nte Imana nihaguruka, ikaza kwibariza; nzasubiza iki?

¹⁵Uwambyaye we se, si yo yamuremye, twese se si yo yatubumbabumbiye mu nda itubyara?

¹⁶Ese hari ubwo nigeze nirengagiza icyifuzo cy’abakene, ngo ndeke amaso y’umupfakazi ampondoberera imbere?

¹⁷Ese nisangizaga umugati jyenyine, ntawuhayeho impfubyi?

¹⁸— kandi jyewe, kuva nkiri muto, Imana yarandeze kibyeyi, ikandengera kuva nkivuka!—

¹⁹Ese hari ubwo nabonye umukene wambaye ubusa, mbona utishoboye yabuze icyo yiyorosa,

²⁰maze ndeka kubahoza mbaha icyo bikinga, no kubasusurukisha uruhu rw’intama zanjye?

²¹Ese hari ubwo nasagariye impfubyi ngo ni uko mbonye rubanda banshyigikiye?

²²Niba rero narakoze bene ayo mahano, ndabirahiye: ndakanantukamo ijosi, ukuboko kwanjye gukonyokere mu nkokora!

²³Koko rero, ubwo Imana yazampindisha umushyitsi, sinshobore guhangarana n’ikuzo ryayo!

²⁴Niba zahabu ari yo nagize amiringiro yanjye, nkibwira ko zahabu iyunguruye ari wo mukiro wanjye,

²⁵niba naranejejwe no kugira umutungo utubutse, nkaba narungutse ibintu byinshi,

²⁶niba narabonye urumuri rubengerana, n’ukwezi kugendana ishema,

²⁷maze umutima wanjye ukararuka, ngakurizaho kubisenga,

²⁸icyo na cyo cyaba ari icyaha nzahanirwa, kuko naba narihakanye Imana yo mu ijuru.

²⁹Ese nigeze nishimira ko umwanzi agize ibyago, mbyinira ku rukoma kubera ibyago byamwugarije?

³⁰Oya, umunwa wanjye ntiwigeze ucumura, ngo ntakambe musabira gupfa.

³¹Ese abo mu ihema ryanjye ntibavugaga bati ’Hari uwo wabona utarariye inyama ze ngo azihage?’

³²Nta muvantara wararaga hanze, imiryango yanjye nayikinguriraga umugenzi.

³³Hari ubwo se nagenje nka bamwe, mpisha ibyaha byanjye, ibicumuro byanjye mbibika ku mutima?

³⁴Hari ubwo se natinye amagambo ya rubanda, n’umugayo w’imiryango, maze ndaceceka, ntinya gusohoka iwanjye?

³⁸Niba ubutaka bwanjye hari icyo bundega, n’imirima yanjye ikaba ibabajwe

³⁹n’uko nariye ibyo yeze ntishyuye, kandi narishe abayikoragamo, ndabirahiye:

⁴⁰niba ari byo, ndakameza amahwa mu mwanya w’ingano, meze na kimari mu mwanya w’indi myaka! Iyaba nashoboraga kugira umuntu wanyumva! Ijambo ryanjye ni iryo, ahasigaye Nyir’ububasha nansubize! Naho ibirego by’umuburanyi wanjye, nzabiheka ku rutugu, ndetse mbyitamirize nk’ikamba. Nzamurikira Imana ibyo nakoze byose, nyegere nshinjagirana ishema, uboshye igikomangoma.» Ngiyo indunduro y’amagambo ya Yobu.