Read kinyarwanda Yobu 32 Bible Online

Yobu 32 - kinyarwanda bible

Yobu 32

¹[38] Ba bagabo batatu bageze aho ntibongera kuvuguruza Yobu, kuko atahwemaga kwiyita intungane.

²Nuko, ibyo birakaza cyane Elihu mwene Barakeli w’i Buzi, mu nzu ya Ramu. Yarakariye Yobu, kuko yishongoraga avuga ko afite ukuri imbere y’Imana.

³Yarakariye kandi za ncuti eshatu, kuko zabuze icyo zisubiza, ntizirenganure Imana.

⁴Igihe bamaze bavugana na Yobu, Elihu yari abateze amatwi, kuko bamurutaga ubukuru.

⁵Ariko Elihu amaze kubona ko ba bagabo batatu ibisobanuro byabakamanye, uburakari buramwegura.

⁶Elihu mwene Barakeli w’i Buzi afata ijambo, agira ati «Jyewe ndacyari muto, naho mwebwe musheshe akanguhe, ni yo mpamvu nagize ubwoba, ngatinya kubatangariza ubumenyi bwanjye.

⁷Ubwo nibwiraga nti ’Inararibonye zirabisobanura, reka ndeke abakuru baduhishurire ubuhanga.’

⁸Ariko umwuka wa Nyir’ububasha, iyo ugiye mu muntu, ni ho amenya ubwenge;

⁹abakuze si bo bene ubuhanga, n’abasaza si bo bene gushishoza.

¹⁰Ni yo mpamvu ngize nti ’Nimutege amatwi, nanjye mbatangarize ubumenyi bwanjye.’

¹¹Dore nakomeje gutegereza amagambo yanyu, ntega amatwi ibitekerezo byanyu; igihe mwashakashakaga amagambo,

¹²nari mbarangamiye. None dore nta n’umwe washoboye kunyomoza Yobu, muri mwe nta washubije amagambo ye.

¹³None rero ntimukibwire ngo ’Twashyikiriye ubuhanga, si umuntu watwigishije, ahubwo ni Imana.’

¹⁴Jyewe sindondobekanya amagambo nk’ayanyu, kandi si na yo nza gukoresha musubiza.

¹⁵Bumiwe, ntibagisubiza, amagambo yabakamanye.

¹⁶Nategereje . . . Mbonye batavuga, barekeye, batagisubiza,

¹⁷niyemeza gusubiza ku giti cyanjye, ngatangaza nanjye ubumenyi bwanjye.

¹⁸Koko rero, amagambo araniganamo, ndiyumvamo umuhate wo kuvuga.

¹⁹Ni byo, umutima wanjye umeze nka divayi ipfutse hose, yashaka kubira, igataratsa ibibindi bishyashya.

²⁰Ndashaka kuvuga kugira ngo ninigure, ngiye kubumbura umunwa wanjye maze nsubize.

²¹Kandi rero, nta we ndi bubere, cyangwa ngo muhakirizweho,

²²sinjya menya guhakwa, kuko Iyandemye yahita inkuraho.