Read kinyarwanda Yobu 34 Bible Online

Yobu 34 - kinyarwanda bible

Yobu 34

¹Elihu arongera afata ijambo, agira ati

²«Mwebwe banyabuhanga, nimwumve amagambo yanjye, namwe bahanga, nimuntege amatwi;

³kuko ugutwi kunyurwa n’amagambo nk’uko akanwa karyoherwa n’ibiryo.

⁴Tugerageze gushishoza tumenye igitunganye, turebere hamwe igikwiye.

⁵Ni koko, Yobu yaravuze ngo ’Ndi intungane, ariko Imana yarantereranye.

⁶Umurava wanjye ntumbuza kubabara, igikomere cyanjye ntigikira, kandi nta cyaha ngira!’

⁷Ni nde wamera nka Yobu, umuntu wirata nk’unywa amazi,

⁸agacudika n’inkozi z’ibibi, kandi akagendana n’abagome?

⁹Yarivugiye ngo ’Gukora ugushaka kw’Imana, nta cyo bimariye umuntu.’

¹⁰None rero, bantu mushyira mu gaciro, nimuntege amatwi: Ubugome buri kure y’Imana, kandi akarengane ntikarangwa kuri Nyir’ububasha!

¹¹Buri wese amwitura ibyo yakoze, kandi akamugenera akurikije imyifatire ye.

¹²Oya rwose, Imana ntiba gito, kandi Nyir’ububasha si we wanga ukuri.

¹³Haba hari undi wamushinze kumenya isi, akanamuragiza ibiyiriho byose?

¹⁴Ese aramutse yishubije umwuka we, akatuvanamo ubuzima akabwisubiza,

¹⁵ibinyamubiri byose ntibyapfira rimwe, umuntu agasubira mu gitaka?

¹⁶Niba ufite ubwenge, umva ibyo nkubwira, utege amatwi amagambo yanjye.

¹⁷Ese uzirana n’ukuri yashobora gutegeka? Watinyuka se gushinja Nyir’ubutungane Ushobora byose?

¹⁸Ni we ubwira umwami, ati ’Nta cyo umaze’, akabwira ibikomangoma ati ’Muri abagome.’

¹⁹Nta bwo arengera abatware, ntabera umukire ngo arenganye umukene, kuko bose ari we wabaremye.

²⁰Bakinduka mu kanya gato, igicuku kinishye; arimbura abakire bakibagirana, kandi yamagana ibikomerezwa, bikabura gitabara.

²¹Koko rero, amaso ye ayahoza ku bantu, akabona aho banyuze hose;

²²nta mwijima cyangwa ijoro inkozi z’ibibi zamwihishamo.

²³Imana ntiha umugambi umuntu, ngo ajye kwiregura imbere yayo.

²⁴Ikindura abakomeye nta we ibajije, maze ku ntebe yabo ikahicaza abandi.

²⁵Izi neza ibikorwa byabo, yahengera nijoro ikabahanantura bagahonyorwa.

²⁶Ibatsibagura kimwe n’abagome, bagakubitirwa ku karubanda aho bose babona,

²⁷kuko baba baranze kuyikurikira, bakirengagiza inzira zayo,

²⁸bigatuma imiborogo y’abakene iyigeraho, ikumva n’induru z’abatishoboye.

²⁹Imana se iretse kugira icyo ikora, hari uwayishinja? Ihishe uruhanga rwayo se, yabonwa na nde? Nyamara igenzura ibihugu n’abantu,

³⁰kugira ngo hatagira umugome utegeka, muri babandi bashaka koreka imbaga mu mutego.

³¹Ariko, hagize ubwira Imana ati ’Narashutswe, sinzongera gukora icyaha,

³²ibyo ntazi, ujye ubinyigisha, kandi niba naracumuye, sinzabyongera’,

³³urumva se yamuhanira ibyaha bye? Ubwo rero unegura imigambi ye, ukaba ari wowe ugomba kwihitiramo igikwiye ntabigutegetse, ngaho ibyo uzi bivuge!

³⁴Nyamara, abantu bashyira mu gaciro, kimwe n’undi munyabuhanga wese ubyumva, bazavuga bati

³⁵’Yobu aravuga nk’injiji, amagambo ye ntiyerekeranye.’

³⁶Koko rero, Yobu akwiye gufatirwa imigambi, kuko yavuze nk’abagiranabi;

³⁷yagize gucumura, none yongeyeho no kwivumbura, bigeza aho bamwe muri twe bashidikanya, kandi akomeza guhata Imana amagambo.»