Read kinyarwanda Yobu 36 Bible Online

Yobu 36 - kinyarwanda bible

Yobu 36

¹Elihu akomeza ijambo rye, agira ati

²«Ba uretse gato, nkwigishe, kuko ndacyafite amagambo Imana yantumye.

³Nzakora iyo bwabaga n’ubwenge bwanjye bwose, mburanire Iyandemye.

⁴Koko rero amagambo yanjye si ibinyoma, uwo muri kumwe ni umugabo w’imvugakuri.

⁵Menya ko Imana ifite ububasha buhagije, kandi ko idatererana umuntu w’intungane;

⁶ntireka umugome ngo yibereho gusa,

⁷ntiyirengagiza intungane, kandi irenganura abakene. Yagabiye abami ingoma, ibicaza ku ntebe y’inteko ubuzira herezo, ariko bo barikuza,

⁸none dore bibohesheje ibiziriko, bari ku ngoyi y’ubutindi.

⁹Yaberetse ibikorwa byabo, ibahishurira ibyaha byabo batewe n’ubwirasi;

¹⁰yazibuye amatwi yabo irababurira, kandi ibategeka kureka ikibi.

¹¹Nibayitega amatwi, bakayiyoboka, bazasazana ihirwe, ubuzima bwabo burangirane umunezero.

¹²Ariko nibanga kumva, bazaboneza inzira y’ikuzimu, bapfe bazize kubura ubwenge.

¹³Naho ab’imitima yuzuye ubugome n’inzika, abo Imana iboha ntibayitakambire,

¹⁴barimbuka bakiri bato, bishwe no konona ubusore bwabo.

¹⁵Ariko umukene, imukirisha ubukene bwe, ubutindi bwe, ikabumuheramo kujijuka.

¹⁶Nawe, izagucisha ukubiri n’imibabaro, uzatengamara, hoye kugira ikikuziga, uzagira ibyo kurya bihagije kandi byiza.

¹⁷Ubwo rero, uzashinja abagome, maze uyoboke inzira y’ubutungane.

¹⁸Uramenye, ntuzashukwe n’abaguha ibintu, cyangwa ngo wicwe n’umurengwe.

¹⁹Umukire uzamucire urubanza kimwe n’udafite zahabu, umuntu ukomeye uzamugenzereze kimwe n’umunyantege nke.

²⁰Ntugapyinagaze abantu b’abavantara, ngo ubasimbuze bene wanyu,

²¹uzirinde kandi, gukurikirana ikibi, kuko ari byo byaguteye kubabazwa bene ako kageni.

²²Ni koko, Imana ifite ububasha bw’ikirenga, ni uwuhe mutware wayigereranya?

²³Ni nde se wayibwiriza ibyo ikora, akubahuka kuyibwira ngo ’Warahemutse’?

²⁴Ahubwo ujye wibuka kurata ibikorwa byayo, mbese nk’uko n’abandi babihimbaje;

²⁵ni iby’abantu bose bashobora kubona, kandi ntibyihishe, byigaragariza kure.

²⁶Ni koko, Imana ifite ubwenge bw’ikirenga, kandi imyaka yayo ntibarika.

²⁷Ni yo ibumbira hamwe amazi yo mu kirere; maze ikayahinduramo ibicu,

²⁸ibicu na byo bikazabyara imvura, maze ibijojoba bigakwiragira imbaga y’abantu.

³¹Iyo mvura ni yo Imana itungisha amahanga, ikabaha ibyo kurya bihagije. Ni nde wakumva umutambagiro w’ibicu, agasobanukirwa n’ukuntu inkuba zibihindiramo? Imana ni yo ikwiza hose ibihu, bigatwikira n’impinga z’imisozi;

³²Iba ifatishije umurabyo amaboko yombi, ikawurekura iwohereza ahantu.

³³Inkuba ihinda itangaza ko ije, n’imvura y’amahindu ikagaragaza uburakari bwayo.