Read kinyarwanda Yobu 38 Bible Online

Yobu 38 - kinyarwanda bible

Yobu 38

¹Uhoraho asubiriza[39] Yobu mu nkubi y’umuyaga, agira ati

²«Uwo ni nde ubangamiye umugambi wanjye, yishingikirije amagambo ye y’amahomvu?

³Kenyera kigabo rero ukomeze, maze nkubaze, unsubize.

⁴Igihe naremaga isi wari he? Ngaho bivuge, umva ko uzi ubwenge!

⁵Imbibi zayo zashyizweho na nde, niba ubizi? Ni nde wayiringanije mu burebure?

⁶Imfatiro zayo zishingiye kuki? Ni nde wayitereye ibuye yicayeho,

⁷igihe inyenyeri z’umuseke zahimbarwaga, n’abamalayika b’Imana bose bavuza impundu?

⁸Ni nde wafatishije inyanja inkombe ebyiri igihe yapfupfunukaga mu nda y’isi;

⁹maze nkayisesuraho ibicu, nkayikindikiza ibihu bibuditse?

¹⁰Nayishingiye urubibi, nyitangiriza inkombe n’ibigomezo,

¹¹ndavuga nti ’Uzagarukira hano, ntuzaharenga; aha ni ho ingufu z’imivumba yawe zizacogorera.’

¹²Kuva wabaho se, wigeze uha amategeko igitondo, n’umuseke uwubwira igihe ugomba gukebera,

¹³kugira ngo uturuke isi mu mpande, maze utahure abagome bayiriho?

¹⁴Nuko ubutaka buhinduka urugina, rukwira agasozi nk’umwambaro.

¹⁵Abagome bo, urumuri rubazimirizwaho, maze uwari ubanguye ukuboko kuravunika.

¹⁶Hari ubwo wari wagera ku isoko y’inyanja, cyangwa ngo utembere mu nyenga y’ikuzimu?

¹⁷Hari ubwo wigeze ubona imiryango yo kwa Nyirarupfu, cyangwa ngo ubone abarinze iryo rembo?

¹⁸Wigeze se uzirikana ukuntu isi ari ngari? Ngaho gira icyo uvuga, niba byose ubizi!

¹⁹Waba se uzi aho urumuri rutaha, cyangwa aho umwijima utuye,

²⁰kugira ngo ube wabiyobora iwabyo, kuko waba uzi inzira ibicyura?

²¹Niba ubizi ni uko icyo gihe wari waravutse, kandi ukaba umaze iminsi!

²²Wageze se mu bigega by’urubura, ubona aho amahindu ahunitse?

²³Ni yo nateganyirije igihe cy’amakuba, nyagenera iminsi y’imirwano n’intambara.

²⁴Uzi urumuri ruca iyihe nzira, rujya kumurika, umuyaga w’iburasirazuba uzi ukwira ku isi unyuze he?

²⁵Ni nde waciye umuyoboro w’amazi y’imvura, kandi akereka inkuba aho zihindira,

²⁶kugira ngo imvura igwe ahantu hadatuwe, mu butayu butarangwamo umuntu,

²⁷amatongo n’ibisambu byaraye bigasoma, maze ahari ubutayu hagahinduka urwuri?

²⁸Ese ubundi imvura ibyarwa na nde? Naho se amazi y’urume ava he?

²⁹Urubura se ruvuka mu yihe nda, amahindu se yo akomoka kuri nde?

³⁰igihe amazi yakomeye nk’ibuye, maze inzuzi zigafatana?

³¹Washobora se guhuza inyenyeri zo mu kirere, cyangwa ukaba wazitandukanya?

³²Ni wowe se umurikisha inyenyeri zo mu gitondo, nyuma ukazimya izo mu rukerera?

³³Ese uzi amategeko agenga ikirere, ku buryo yakurikizwa no ku isi?

³⁴Washobora kugeza ijwi ryawe ku ijuru, ngo uhamagare imvura ikumvire?

³⁵Imirabyo se ishyira nzira ari uko uyohereje, cyangwa imaze kukubwira iti ’Turi hano’?

³⁶Ni nde wahaye nyirabarazana kwitonda, agaha isake ubwenge ifite?

³⁷Ubara ibicu atibeshya ni nde, agahengekera mu kirere ibigega by’imvura,

³⁸igihe umukungugu utumuka ari mwinshi, n’ibinonko byakomeye nk’amabuye?

³⁹Yaba se ari wowe uhigira intare y’ingore ikiyitunga, ukamara ipfa ibyana byayo,

⁴⁰iyo bibunze mu ndiri yabyo, byubikiye icyo byafata?

⁴¹Ni nde ushakira ikiyoni ikigitunga, iyo ibyana byacyo bitakambira Imana, bikabungera, byabuze icyo birya?