Read kinyarwanda Yobu 39 Bible Online

Yobu 39 - kinyarwanda bible

Yobu 39

¹Uzi se imibyarire y’impongo, cyangwa witegereje uko amasha abigenza abyara?

²Ese wayabariye iminsi ahaka, ngo ube wamenya igihe azabyarira?

³Aca bugufi rero, akabyara, akururuka icyo yahakaga;

⁴ibyana byayo byamara kugimbuka, bigafata iy’agasozi, bikigendera ubutazagaruka.

⁵Ni nde washumuye indogobe y’agasozi, akayiha kwigira aho ishaka?

⁶Ni jye wayigeneye kuba mu rwuri, nyituza mu bigarama by’urwunyunyu.

⁷Ntiyita ku rusaku rwo mu migi, cyangwa ngo imenwe amatwi n’urwamu rw’abarinzi.

⁸Ahubwo itambagira imisozi irishamo, ikagenda ishakashaka urwuri rutoshye.

⁹Imbogo se yo yakunda ko uyikoresha? Yakwemera se kurara mu kiraro cy’amatungo yawe,

¹⁰cyangwa ko uyishumika ikiziriko mu ijosi? Hari ubwo se washobora kuyihingisha imirima yawe?

¹¹Wakwiringira se ko ifite imbaraga nyinshi, maze ukayishiburira imirimo yawe?

¹²Wakwizera se ko izibwiriza ikaza, ngo ikwanurire imyaka iri ku mbuga?

¹³Mbuni isabagirana ishema amababa yayo, ikishimira amabara meza ayitatse;

¹⁴nyamara iyo yateye amagi yayo ikayarenzaho igitaka, ikayarekeramo ngo yumve ubushyuhe,

¹⁵ntiteganya ko hari uwayahonyora, cyangwa inyamaswa yayamenagura.

¹⁶Abana bayo ibafata nabi, nk’aho itababyaye, n’iyo bahonyotse ntibababazwa n’uko yagokeye ubusa.

¹⁷Ibyo ibiterwa n’uko Imana yayimye ubwenge, nta bumenyi yigeze iyigenera.

¹⁸Ariko, iyo irambuye intambwe, igatangira kwiruka, isiga ifarasi n’uyigenderaho.

¹⁹Imbaraga ifarasi igira, ni wowe se waziyiteye, umugara ukindikije ijosi ryayo ni wowe se wawuyambitse,

²⁰cyangwa ni wowe uyitera kwikinangura nk’inzige? Iyo yivuganye ishema, ibintu birakangarana.

²¹Igera mu bigarama, igasaza imigeri, igakataza igana urugamba,

²²yabera ntijya itinya ngo igire ubwoba, kandi ntikangwa inkota.

²³Iyo imitana iyivugiza hejuru, amacumu yatukuje imbuga n’imyambi ivumera,

²⁴usanga ica ibintu isa n’iyenda kuguruka, maze ihembe ryavuga ntihagire ikiyitangira,

²⁵Iyo ihembe rivuze, na yo ivuza akamo, ikamenyeraho ko urugamba rushotswe, ku ikobe ry’abatware n’induru y’abarwana.

²⁶Harya ni wowe utoza agaca kuguruka, maze kakaboneza iyo mu majyepfo?

²⁷Ni wowe se, utegeka kagoma gutumbagira hejuru, ikarika mu mpinga y’umusozi?

²⁸Urutare yarugize intaho yayo nijoro, ku isonga yarwo aho batayishyikira.

²⁹Iharerekera icyo ishaka kwica, kandi amaso yayo aba yakibonye kare!

³⁰Ibyana byayo ibihaza inyama, aho intumbi ziri, na yo ntihatangwa.»