Read kinyarwanda Yobu 40 Bible Online

Yobu 40 - kinyarwanda bible

Yobu 40

¹Uhoraho arakomeza, abwira Yobu, ati

²«Umuburanyi wa Nyir’ububasha ntaremera se, ko yatsinzwe? Unyomoza Imana aracyafite icyo asubiza?»

³Yobu asubiza Uhoraho, agira ati

⁴«Ni koko, nakinnye mu bikomeye; nabona nsubiza iki? Ahasigaye ni ugupfuka umunwa ngaceceka.

⁵Dore imbara navugiye, sinzasubiza; navuze menshi, sinzongera.»

⁶Uhoraho asubiza Yobu mu nkubi y’umuyaga[40], agira ati

⁷«Kenyera kigabo rero ukomeze, maze nkubaze unsubize.

⁸Harya ngo ibyo nemeje uzabivuguruza, unshinje, maze untsinde?

⁹Ese ufite ububasha nk’ubw’Imana, ijwi ryawe se, rirakangaranya nk’iryayo?

¹⁰Ngaho rero itamirize ishema n’ububasha, wuzure icyubahiro n’ububengerane,

¹¹ujye ukwiza hose uburakari bwawe, abirasi ubarebe igitsure bacebe,

¹²ukwiteruyeho wese umucubye, abakugomeye ubarimbure rugikubita,

¹³maze ubazike mu gitaka, ubafungiranire mu buroko.

¹⁴Nanjye ubwanjye nzaguhimbaza, kuko ubutwari bwawe bwagukijije.

¹⁵Zirikana ko imvubu nayiremye kimwe nawe, ikaba itunzwe no kurisha nk’imfizi.

¹⁶Uzayirebe, imbaraga zayo ziba mu matako, naho ubukaka bwayo bukaba mu gituza.

¹⁷Irega umurizo ukagira ngo ni ingiga y’igiti, imitsi y’amatako yayo irasobekeranye.

¹⁸Amagufa yayo, wagira ngo akoze mu byuma, amaguru n’amaboko byayo bikomeye nk’umutarimba.

¹⁹Irusha imbaraga ibiremwa by’Imana byose, yagizwe umutware w’ibindi bikoko,

²⁰kuko n’imisozi iyihakwaho, kimwe n’ibindi bikoko byose byo mu ishyamba.

²¹Iryama mu rufunzo, ikabyagira mu ruseke rwo mu bishanga;

²²ikugama izuba mu gicucu cyarwo ikikijwe n’ibihuru byo ku ruzi.

²³N’iyo uruzi rwuzuye, ntihangayika, n’iyo rwayigera mu menyo, iguma hamwe.

²⁴Hari ushobora kuyinogoramo amaso se, cyangwa ngo ayipfumure amazuru?

²⁵Ese hari uwarobesha ingona urushundura, ngo ayishumike umugozi ku rurimi?

²⁶Uramutse se uyikuruye amazuru, ukayitoboza icyuma urwasaya,

²⁷urakeka ko yagutakambira, ikakubwiza akarimi keza?

²⁸Ubwo se, wagirana na yo isezerano, kugira ngo ikubere umugaragu burundu?

²⁹Watinyuka se kuyikinisha nk’akanyoni, cyangwa kuyigiramo igikinisho cy’abakobwa bawe?

³⁰Abarobyi se bayigenera igiciro, maze bakayigemurira abacuruzi?

³¹Uruhu rwayo se rwatoborwa n’imyambi, cyangwa igihanga cyayo amacumu yacyigerera?

³²Uzase n’uyikozaho ikiganza, urebe ukuntu ikwamagana, uzaherako uyizinukwa.