Read kinyarwanda Yobu 42 Bible Online

Yobu 42 - kinyarwanda bible

Yobu 42

¹Yobu asubiza Uhoraho[41] agira ati

²«Nzi ko ushobora byose, kandi nta mugambi wawe uburizwamo.

³Ni nde wagutambamira, kandi atagira ubwenge? Ni koko, napfuye kuvuga ntasobanukiwe, mpubukira ibitangaza bindenze kandi ntazi.

⁴(Tega amatwi, ureke mvuge, ngiye kukubaza, nawe unsubize[42].)

⁵Ubundi najyaga nkubwirwa mu nkuru, none, nakwiboneye n’amaso yanjye;

⁶ni yo mpamvu nicujije ibyo navuze, ndabyihannye ; dore nicaye mu ivu no mu mukungugu.»

⁷Uhoraho amaze kugeza kuri Yobu ayo magambo, abwira Elifazi w’i Temani, ati «Nabarakariye cyane, wowe n’izo ncuti zawe ebyiri, kuko mutamvuze neza nk’uko umugaragu wanjye Yobu yabigenje.

⁸None rero, nimushake ibimasa birindwi n’amasekurume y’intama arindwi, maze musange umugaragu wanjye Yobu. Muzatura igitambo gitwikwa, umugaragu wanjye Yobu abasabire imbabazi[43]. Nzamwumva, maze noye kubahanira ko mutamvuze neza nk’uko Yobu umugaragu wanjye yabigenje.»

⁹Elifazi w’i Temani, Bilidadi w’i Shuwa, na Sofari w’i Nahama, baragenda bakora uko bari bategetswe, maze Uhoraho na we yumva icyo Yobu amusabye.

¹⁰Igihe Yobu yasabiraga imbabazi incuti ze, Uhoraho yamushubije umunezero we, umutungo yahoranye awukuba kabiri.

¹¹Abavandimwe be, bashiki be n’incuti ze za kera, baza kumusura, basangira umugati mu nzu ye. Baramuririye, banamuhoza agahinda yatewe n’ibyago Uhoraho yamwoherereje. Buri wese agenda amuha igiceri cya feza, n’impeta ya zahabu.

¹²Nuko Uhoraho aha Yobu umugisha, urenze ndetse uwo yahoranye. Yatunze intama ibihumbi cumi na bine, ingamiya ibihumbi bitandatu, ibimasa by’inkone ibihumbi bibiri, n’indogobe z’amanyagazi igihumbi.

¹³Yabyaye abahungu barindwi n’abakobwa batatu.

¹⁴Umukobwa umwe yamwise «Nyiranuma», uwa kabiri amwita «Bwiza», uwa gatatu amwita «Mukaburanga».

¹⁵Mu gihugu cyose, nta bakobwa beza nk’abo bari bahari. Yobu yabahaye iminani kimwe na basaza babo.

¹⁶Nyuma y’aho, Yobu yabayeho indi myaka ijana na mirongo ine, abona abuzukuru, abuzukuruza, ageza no ku buvivi.

¹⁷Nuko Yobu apfa yisaziye neza, yarabonye ibintu n’ibindi.