Read kinyarwanda Yobu 6 Bible Online

Yobu 6 - kinyarwanda bible

Yobu 6

¹Yobu afata ijambo[14], agira ati

²«Iyaba bashoboraga kumva agahinda kanjye, ngo bapimire ku munzani amakuba yanjye,

³basanze arusha uburemere umusenyi wo ku nyanja, ikaba ari na yo mpamvu mvuga amateshwa !

⁴Koko kandi, imyambi ya Nyirububasha yantebeyemo, n’umutima wanjye wanyoye ubumara bwayo ; uburakari bw’Imana bwankoraniyeho.

⁵Ese indogobe yahebeba ibona ubwatsi, cyangwa ikimasa kikabira kiri mu rwuri ?

⁶Ibiryo bibishye se, wabirya nta munyu ? Umweru w’igi se ugira icyanga ?

⁷Ibiryo nk’ibyo nanze kubyasamira, n’umutima wanjye wazinutswe uwo mugati.

⁸Icyampa ngo icyo nsabye ngihabwe, maze Imana insubize amizero yanjye !

⁹Icyampa ngo Imana ibe ari yo injanjagura, inkubite mu cyico inkureho.

¹⁰Bityo n’ubwo ndi mu kaga karenze urugero, byibura nashimishwa n’icyo cyizere cy’uko ntihakanye amagambo ya Nyirubutungane.

¹¹Ubu se nsigaranye imbaraga ki ngo mbe nakwiyumanganya; ko ibyanjye birangiye, icyo nkizeye ni iki?

¹²None se nacuzwe mu mabuye, cyangwa umubiri wanjye ukozwe mu muringa?

¹³Hari ikindi kindi se nakwishingikirizaho, ko n’icyari kuntera inkunga cyose cyanyitaruye?

¹⁴Utagiriye impuhwe mugenzi we, aba yanze kubaha Nyirububasha!

¹⁵Abavandimwe banjye barantereranye, babaye nka ya migezi ihimba ari uko imvura yaguye.

¹⁶Mu itumba, usanga yuzuye amazi akonje, kubera imvura n’urubura byayujuje,

¹⁷ariko icyi cyaza igahita ikama, izuba ryacana, igaherako yuma.

¹⁸Ku mpamvu yayo, imbaga z’abagenzi ziteshwa inzira, zikaboneza iy’ubutayu, ziyobagurika.

¹⁹Imbaga z’abagenzi b’i Temani zikayishakashaka hose, ab’i Sheba ni yo bashingiyeho amizero.

²⁰Amaherezo, icyizere cyabo kikagwa ku busa, bagera ku nkombe zayo, bagashoberwa.

²¹Namwe rero, ubu ni ko mumerewe, mwasanze nteye ubwoba, maze ibikoba birabakuka.

²²Ese hari ubwo nigeze mbasaba nti ’Nimugire icyo mumpa, mukore mu mutungo wanyu mumfashe,

²³kandi munkize ukuboko k’umubisha, munandinde abankandamiza’?

²⁴Ngaho nimumpanure, ndaceceka, munyereke aho natandukiriye, ngacumura.

²⁵Amagambo y’ukuri umuntu yayihanganira; ariko se mwe ibyo munjora, bigamije iki?

²⁶Muranshinja se muhereye ku byo navuze, kandi ari imvugo y’uwihebye itwarwa n’umuyaga!

²⁷Ndumva mwebwe mwarya n’imfubyi, mukagambanira incuti yanyu!

²⁸Ngaho rwose nimundebe, ndabibasabye, imbere yanyu sinabeshya!

²⁹Ahasigaye mungarukire, mwoye kundenganya; mungarukire, kuko ntatezutse ku butabera.

³⁰Ese hari ikinyoma musanze ku rurimi rwanjye? Umunwa wanjye se, waba utagishobora kuvangura icyago?