Read kinyarwanda Yobu 7 Bible Online

Yobu 7 - kinyarwanda bible

Yobu 7

¹Hano ku isi, kubaho k’umuntu ni nko kurwana intambara, kandi ubuzima bwe nta ho butaniye n’ubw’umucancuro.

²Jyewe rero, nsa n’umucakara wifuza amafu, cyangwa umucancuro uharanira agahembo ke;

³incuro yanjye yabaye amezi yo kumanjirwa, amajoro y’ububabare ambera igihembo.

⁴Iyo ndyamye, ndavuga ngo ’Icyampa ngo byuke’; naba mbyutse nti ’Ntibwira nkiriho’; nuko nkirirwa mbunza imitima ntyo umugoroba ugakika.

⁵Umubiri wanjye urajejeta inyo, wuzuye amaga n’imvuvu, uruhu rwanjye ruriyasa rugasuka amashyira.

⁶Iminsi y’ukubaho kwanjye iriruka amasigamana, irazimira ubutagaruka.

⁷Ibuka ko ubugingo bwanjye ari nk’umuyaga, amaso yanjye ntakibonye ihirwe ukundi.

⁸Amaso y’abantu amperutse ubu, n’ayawe azandora, ariko ntakiriho.

⁹Uko ibihu biyoyoka bikagenda, ni na ko umanukiye ikuzimu atahazamuka;

¹⁰ntagaruka mu nzu ye, n’aho yari atuye ntihongera kumubona ukundi.

¹¹Ni yo mpamvu ntashobora guceceka, nzavuga agahinda kanzengereza, namamaze amaganya anyuzuye umutima.

¹²Naba se ndi inyanja, cyangwa cya gikoko[15] kiyibamo, ngo undindishe ijoro n’amanywa?

¹³Iyo nibwiye nti «Nindyama, ndoroherwa, uburiri bungabanyirize amaganya»,

¹⁴wowe unyoherereza inzozi zikantera ubwoba, ibyo mbonye bikankura umutima.

¹⁵Yewe icyampa ngo baze bampotore! Kuri jyewe gupfa nkavaho byandutira iyi mibabaro yose.

¹⁶Nduma mpagaze, sinkibayeho, ukundi, have ndeka, ubuzima bwanjye ni akanyuzo!

¹⁷Umuntu ni iki kugira ngo umwiteho bigeze aho, ngo uhore umuhanze amaso,

¹⁸ngo umusuzume buri gitondo, ngo umugenzure buri kanya?

¹⁹Uzampozaho ijisho kugeza ryari? Wampaye nibura agahenge, nkamiraza amacandwe.

²⁰Mbaye umunyabyaha, byaba bigutwaye iki, wowe, mugenzuzi w’abantu utarambirwa? Ni iki gituma unyibasira, nk’aho jye naba nkubangamiye?

²¹Mbese, ntushobora kwihanganira igicumuro cyanjye, ngo icyaha cyanjye ucyirengeho? Nanone ejobundi nzaba ndyamye ikuzimu, uzanshakashaka ariko ntakiriho.»