Read kinyarwanda Yobu 8 Bible Online

Yobu 8 - kinyarwanda bible

Yobu 8

¹Bilidadi w’i Shuwa afata ijambo[16], agira ati

²«Uzavuga utyo kugeza ryari, uzahereza he ayo magambo asa n’inkubi y’umuyaga?

³Imana se yakwirengagiza ukuri, cyangwa se yacisha ukubiri n’ubutabera?

⁴Abana bawe, niba barayigomeye, baryojwe ibyaha bakoze.

⁵Naho wowe, isunge Imana; ujye utakambira Nyir’ububasha!

⁶Niba uri intungane ukaba n’umunyamurava, guhera ubu azakwitaho, agusubize ibiberanye n’ubutungane bwawe;

⁷uko uzaba umeze, bizaba bisumbye kure uko wari uri mbere.

⁸Jya usobanuza abakuruta, kandi wite ku nama z’abasogokuru.

⁹Twebwe turi abana b’ejo, nta cyo tuzi, kandi hano ku isi ubuzima bwacu ni akanyuzo!

¹⁰Naho bo, muzaganira bakwigishe, bagutoze iyi migani ibitse mu mutima wabo:

¹¹Urufunzo se rushobora kumera ahatari igishanga? Urukangaga rwamera ahatareka amazi?

¹²Iyo bikiri ingemwe kandi nta we ubitemye, binamba mbere y’ibindi byatsi byose.

¹³Ayo ni yo maherezo y’uwibagirwa Imana, kandi ni uko amizero y’uyigomera ayoyoka.

¹⁴Aba ameze nk’uwishingikirije ku kadodo, agasa nk’utuye mu cyari cy’igitagangurirwa.

¹⁵Iyo yegamiye inzu ye, irahirima, yakomeza kuyishingikirizaho, igasenyuka.

¹⁶Ameze nk’igiti kiyagirana ku zuba, ugasanga cyuzuyeho imimero,

¹⁷kigashora imizi mu rutare, ndetse no mu mabuye rwagati.

¹⁸Ariko iyo bakiranduye, ubutaka bwacyo buracyihakana buti ’Sinigeze nkubona!’

¹⁹Ngicyo kirambaraye ku nzira kiriho kirabora, naho mu kibanza cyacyo haramera ibindi biti.

²⁰Oya, Imana ntiyamagana umunyakuri, kandi ntishyigikira inkozi z’ibibi.

²¹Umunwa wawe izongera iwuzuze ibitwenge, umutima wawe unezerwe.

²²Abanzi bawe bazakorwa n’isoni, kandi ihema ry’abagome rizasenyuka.»