Read kinyarwanda Zaburi 10 Bible Online

Zaburi 10 - kinyarwanda bible

Zaburi 10

¹[12] Nyagasani, ni iki gituma witaza, ukihisha mu bihe by’amage?

²Mu gihe umugiranabi yigamba, indushyi zifatirwa mu mutego yazishandikiye.

³Umugiranabi yirata ko yageze ku ntego ye, kuba yabonye icyo yifuzaga bigatuma atuka Uhoraho akamusuzugura.

⁴Umugiranabi ashinga ijosi, agaterera agati mu ryinyo, ngo «Nta Mana ibaho!» Ngubwo ubwenge bwe.

⁵Igihe cyose ibyo akora biramuhira; n’ubucamanza bwawe buramurenze, abanzi be akabasuzugura bikabije.

⁶Akunda kwibwira ngo «Ndi indatsimburwa, no mu bihe bizaza nta cyago kizankoraho.»

⁷Akanwa ke kuzuye imivumo, ibinyoma n’uburyarya, ajunditse ubugiranabi n’ubugome.

⁸Yubikira hafi y’insisiro, akihishahisha ngo yice intungane; agahora agenza umunyantege nke.

⁹Arubikira nk’intare ibunze mu gihuru; akubikira ngo asumire umunyabyago, agasumira umunyabyago amuroha mu mutego we.

¹⁰Arabanza akabunda, agatega, maze uko yakabaye akiroha ku banyantege nke,

¹¹yibwira ati «Imana ntibyitaho, yahishe uruhanga rwayo, nta cyo yigera ibona.»

¹²Uhoraho, haguruka! Mana, kinga ukuboko, woye kwibagirwa abanyabyago!

¹³Kuki umugiranabi yasuzugura Imana, akagenda yibwira ngo nta cyo uzamutwara?

¹⁴Nyamara wowe ubona ishavu n’amarira, maze ukiyemeza kubyitaho; umunyantege nke arakwiragiza, kandi n’imfubyi ukayitabara.

¹⁵Burizamo ububasha bw’umugiranabi, umuryoze ububi bw’ibyo yakoze, he kuboneka n’agasigisigi k’ubugome bwe.

¹⁶Uhoraho ni Umwami w’ibihe byose, abatamuzi bashize mu gihugu cye.

¹⁷Uhoraho, wumva ibyifuzo by’abiyoroshya, ukabakomeza umutima, ugahora ubateze amatwi,

¹⁸maze imfubyi n’abaryamirwaga ukabakiranura, kugira ngo ku isi hatazagira umuntu wongera kwigira umuhinza.