Read kinyarwanda Zaburi 101 Bible Online

Zaburi 101 - kinyarwanda bible

Zaburi 101

¹[115] Ni zaburi iri mu zo bitirira Dawudi. Ngiye kuririmba impuhwe n’ubutungane, maze ngucurangire, wowe Uhoraho.

²Ngiye kwibanda ku nzira y’ubutungane; mbese uzansanganira ryari? Nzaharanira ubutungane bw’umutima wanjye, mu bo tubana.

³Sinzigera nshimishwa n’ibidakwiye, nk’uko nanga imyifatire y’abahakanyi; ntiteze kuzanyanduza.

⁴Uw’umutima uryarya arangendere kure; nta ho mpuriye n’ubukozi bw’ibibi.

⁵Ubeshyera mugenzi we rwihishwa, nzamucecekesha. Abasuzugura abandi n’abirata, abo sinzabihanganira.

⁶Mu gihugu, nzahitamo abantu b’inyangamugayo, kugira ngo abe ari bo bankikiza. Ugendera mu nzira iboneye, ni we uzambera umunyamirimo.

⁷Umuntu wazobereye mu kubeshya, nta cyicaro azagira mu nzu yanjye, umunyabinyoma na we, ntazantunguka mu maso.

⁸Buri gitondo nzatsemba abagiranabi bose bo mu gihugu, kugira ngo abakora ibibi bose, mbarimbure mu murwa w’Uhoraho.