Read kinyarwanda Zaburi 103 Bible Online

Zaburi 103 - kinyarwanda bible

Zaburi 103

¹[117] Ni zaburi iri mu zo bitirira Dawudi. Mutima wanjye, singiza Uhoraho, n’icyo ndi cyo cyose gisingize izina rye ritagatifu!

²Mutima wanjye, singiza Uhoraho, kandi ntiwibagirwe na kimwe mu byo yaguhaye!

³We ubabarira ibicumuro byawe byose, akakuvura indwara zawe zose;

⁴we warura ubugingo bwawe mu mva, akagutamiriza ubutoneshwe n’impuhwe;

⁵we uhunda ubuzima bwawe ihirwe, maze ubuto bwawe bukiyuburura nk’ubwa kagoma[118].

⁶Uhoraho akoresha ubutabera, akarenganura abapfukiranwa bose.

⁷Yamenyesheje Musa imigambi ye, n’abana ba Israheli abagaragariza ibigwi bye.

⁸Uhoraho ni umunyambabazi n’umunyampuhwe, atinda kurakara, kandi akagira ibambe.

⁹Ntatongana ngo bishyire kera, ntarwara inzika ubuziraherezo;

¹⁰ntaduhana bihwanye n’ibicumuro byacu, ntatwihimura akurikije amafuti yacu.

¹¹Uko ijuru ryisumbuye kure hejuru y’isi, ni ko impuhwe ze zisagiranira abamutinya;

¹²uko uburasirazuba butandukanye n’uburengerazuba, ni ko adutandukanya n’ibicumuro byacu.

¹³Uko umubyeyi agirira ibambe abana be, ni ko Uhoraho agirira ibambe abamutinya;

¹⁴koko azi neza icyo twabumbwemo, akibuka ko turi umukungugu.

¹⁵Iminsi y’umuntu ni nk’ibyatsi, akabumbuka nk’ururabo rwo mu murima;

¹⁶umuyaga wamuhuhaho akazimira, akazimira adasize akarari.

¹⁷Naho impuhwe z’Uhoraho zikomerezwa abamutinya, kuva iteka kuzageza iteka ryose, n’ubutabera bwe bugahora ku bana

¹⁸no ku buzukuru b’abakomeza Isererano rye, kandi bakibuka amatangazo ye ngo bayakurikize.

¹⁹Uhoraho yashinze mu ijuru ijabiro rye, maze ingoma ye ikagenga byose.

²⁰Nimusingize Uhoraho, bamalayika be mwese, mwe ntwari z’indatwa, mwubahiriza ijambo rye, mukamwumvira ako kanya akivuga.

²¹Nimusingize Uhoraho, ngabo ze mwese, mwe mutunganya icyo ashatse cyose.

²²Nimusingize Uhoraho, biremwa bye mwese, aho muri hose mu ngoma ye. Mutima wanjye, singiza Uhoraho!