Read kinyarwanda Zaburi 105 Bible Online

Zaburi 105 - kinyarwanda bible

Zaburi 105

¹[121] Alleluya! Nimushimire Uhoraho, mwambaze izina rye, nimurate ibigwi bye mu yandi mahanga;

²nimumuririmbire, mumucurangire, nimuzirikane ibitangaza yakoze;

³nimwishimire izina rye ritagatifu, muhimbarwe, mwebwe abashakashaka Uhoraho!

⁴Nimugarukire Uhoraho Nyir’ububasha, mushakashake uruhanga rwe ubudahwema.

⁵Nimwiyibutse ibikorwa bye bihebuje, ibitangaza yakoze, n’amatangazo yivugiye,

⁶mwebwe, nkomoko ya Abrahamu umugaragu we, bahungu ba Yakobo, abatoni be!

⁷Ni we Uhoraho, Imana yacu, umugenga w’isi yose.

⁸Ahora yibuka ibyo yasezeranye bidasubirwaho, ijambo yarahiriye amasekuruza igihumbi,

⁹rya sezerano yagiranye na Abrahamu, akarisubiriramo Izaki mu ndahiro,

¹⁰rikaba umugambi yakomereje Yakobo, n’isezerano ry’iteka yagiriye Israheli,

¹¹igihe avuze ati «Nzaguha igihugu cya Kanahani, kibe umugabane wegukanye!»

¹²N’ubwo bari bakiri mbarwa, ari agatsinda k’abasuhuke,

¹³bava mu gihugu bajya mu kindi, bava mu mahanga bajya mu yandi,

¹⁴Uhoraho ntiyaretse hagira ubahuganya, ndetse yihaniza abami,

¹⁵agira ati «Ntimugakore ku ntore zanjye, kandi ntimukagirire nabi abahanuzi banjye!»

¹⁶Nuko ateza inzara mu gihugu, ibyo kurya birabura;

¹⁷abanza koherezayo umuntu, Yozefu, wari umaze kugurwa bucakara.

¹⁸Ibirenge bye babibohesha ingoyi, ijosi rye baryambika iminyururu,

¹⁹kugeza ubwo ijambo ry’Uhoraho rigaragaje ko ari umwere.

²⁰Umwami ategeka kumubohora, umutegetsi w’amahanga aramufunguza.

²¹Amugira umugenga w’urugo rwe, umutegetsi w’ibintu bye byose,

²²kugira ngo yigishe ibikomangoma uko ashaka, n’abanyacyubahiro be abatoze ubuhanga.

²³Nuko Israheli aza mu Misiri, Yakobo asuhukira mu gihugu cya Kamu.

²⁴Uhoraho aha umuryango we kororoka, urusha amaboko abanzi bawo;

²⁵abahindura umutima ngo bange umuryango we, ngo bicishe amayeri abagaragu be.

²⁶Atuma Musa, umugaragu we, na Aroni yari yaritoreye.

²⁷Bombi berekanira ibimenyetso mu Misiri, n’ibitangaza by’Uhoraho mu gihugu cya Kamu.

²⁸Yohereza umwijima, haba icuraburindi, ariko ntibahugukira ijambo rye.

²⁹Amazi yabo ayahindura amaraso, yica amafi yabo.

³⁰Igihugu cyabo kijagatamo imitubu, ndetse no mu byumba by’abami babo.

³¹Avuga rimwe, maze ibibugu birabatera, n’udukoko dutwikira igihugu cyabo cyose.

³²Agusha urubura mu mwanya w’imvura, n’imirabyo ikwiza umuriro mu gihugu cyose;

³³aritagura imizabibu n’imizeti byabo, avunagura ibiti by’igihugu cyabo.

³⁴Yongera kuvuga, maze inzige ziratera, n’ibihore bitagira ingano;

³⁵birya ibyatsi byose mu gihugu cyabo, birya n’imbuto z’ubutaka bwabo.

³⁶Nyuma anangura icyitwa uburiza cyose mu gihugu, n’abana b’imfura bibarutse bakiri abasore.

³⁷Nuko ahakura abe bitwaje feza na zahabu, nta n’umwe uhutaye mu miryango yabo.

³⁸Misiri yishimira ko bagiye, kuko ubuhahamuke bwari bwabajunjitse.

³⁹Uhoraho ababambika hejuru igicu kibatwikira, akongeza n’inkingi y’umuriro wo kubamurikira nijoro.

⁴⁰Bamutakiye, aboherereza inkware, abahaza umugati uturutse ku ijuru.

⁴¹Akingura urutare, maze amazi aravubuka; atemba nk’uruzi mu butaka bwumiranye.

⁴²Koko yibutse isezerano rye ritagatifu yagiriye Abrahamu, umugaragu we!

⁴³Nuko yimura umuryango wishimye, intore ze zisohokana urwamo rw’impundu.

⁴⁴Abaha ibihugu by’abanyamahanga, maze bazungura ibyaruhiwe n’indi miryango,

⁴⁵kugira ngo bazakurikize amatangazo ye, kandi bazakomeze amategeko ye.