Read kinyarwanda Zaburi 107 Bible Online

Zaburi 107 - kinyarwanda bible

Zaburi 107

¹[123] Alleluya! Nimushimire Uhoraho kuko agwa neza, n’urukundo rwe rugahoraho iteka.

²Abo Uhoraho yarwanyeho nibabyivugire, bo yakuye mu maboko y’umwanzi,

³maze akabakorakoranya abavana mu bihugu byose, mu burasirazuba no mu burengerazuba, mu majyaruguru no mu majyepfo.

⁴Hari ababungeraga mu butayu, bakagenda ahantu hataba na mba, ntibabone inzira yerekera mu mugi utuwe;

⁵bakicwa n’inzara n’inyota, bakumva imitima yabo yaguye isari.

⁶Nuko batakambira Uhoraho mu mage barimo, na we abakiza imibabaro yabo;

⁷abayobora mu nzira ibangutse, kugira ngo bagere mu mugi utuwe.

⁸Nibashimire rero Uhoraho impuhwe ze, n’ibitangaza akorera bene muntu!

⁹Kuko yahaye icyo kunywa uwicwaga n’inyota, uwari ushonje akamufungurira, akijuta.

¹⁰Hari abari batuye mu mwijima no mu gicucu cy’urupfu, bafungiranye mu byago no mu minyururu,

¹¹kubera ko bari bigize ibigande ntibumvire Imana, maze bagasuzugura imigambi y’Umusumbabyose.

¹²Ni bwo imitima yabo ayicishije agahinda, bagwa umudari batagira kirengera.

¹³Nuko batakambira Uhoraho mu mage barimo, na we abakiza imibabaro yabo;

¹⁴abasohora mu mwijima no mu gicucu cy’urupfu, acagagura ingoyi zari zibaboshye.

¹⁵Nibashimire rero Uhoraho impuhwe ze, n’ibitangaza akorera bene muntu!

¹⁶Kuko yamenaguye inzugi z’imiringa, akajanjagura ibihindizo by’ibyuma.

¹⁷Hari abandi bari ibirimarima kubera ubusare bwabo, bahinduka nabi kubera ibyaha bahoragamo;

¹⁸imitima yabo ihurwa icyitwa ibyo kurya, byanga hato ngo barenge amarembo y’ikuzimu.

¹⁹Nuko batakambira Uhoraho mu mage barimo, na we abakiza imibabaro yabo;

²⁰avuga ijambo ryo kubakiza, abarinda kujya mu mva.

²¹Nibashimire rero Uhoraho impuhwe ze, n’ibitangaza akorera bene muntu!

²²Nibature ibitambo byo kumusingiza, bamamaze ibikorwa bye bishimye.

²³Abakunda kugenda mu nyanja batwawe n’amato manini, bagacururiza mu mazi y’isanzure,

²⁴abo ngabo biboneye ibikorwa by’Uhoraho, n’ibitangaza agaragariza mu ngeri y’inyanja.

²⁵Yavuze rimwe, maze habyuka umuyaga w’inkubi, ututumbisha ibitunda mu nyanja.

²⁶Nuko bakajya mu birere, hanyuma bagacubira ikuzimu, bakarwara bakamererwa nabi cyane;

²⁷bakagira isereri bakadandabirana nk’abasinzi, ubuhanga bari basanganywe bukayoyoka.

²⁸Nuko batakambira Uhoraho mu mage barimo, na we abakiza imibabaro yabo;

²⁹wa muyaga w’inkubi awugaruramo ituze, ibitunda by’inyanja birahwama.

³⁰Nuko bishimira ko ituze rigarutse, maze Uhoraho abajyana mu mwaro bashakaga.

³¹Nibashimire rero Uhoraho impuhwe ze, n’ibitangaza akorera bene muntu!

³²Nibamuratire mu ikoraniro rya rubanda, bamusingirize no mu iteraniro ry’abakuru b’imiryango.

³³Inzuzi azihindura ubutayu, ahari amasoko y’amazi hakumagara,

³⁴n’igihugu cyera akagihindura ubutaka bw’umunyu, ku mpamvu y’ubugiranabi bw’abahatuye.

³⁵Ubundi kandi ubutayu akabuhindura ikidendezi cy’amazi, n’ahantu h’imburamazi akahahindura amasoko;

³⁶maze akahatuza abari bashonje, bakahubaka umugi wo kubamo,

³⁷bagahinga imirima, bagatera imizabibu, bagasarura imbuto zeze.

³⁸Uhoraho akabaha umugisha, bakororoka uko bukeye, kandi ntareke amatungo yabo agabanuka.

³⁹Nyuma bakaza kugenda bagabanuka, bakazahara, babitewe n’ubutindahare, ibyago n’ububabare.

⁴⁰Nuko agasuzuguza abakomeye, akababungereza ku gasi batazi iyo bajya.

⁴¹Nyamara akazamura umukene amukuye mu butindahare, n’imiryango akayiha kugwira nk’amashyo y’amatungo.

⁴²Abantu b’intungane barabireba, bakishima, naho abagizi ba nabi bakaruca bakarumira.

⁴³Mbese hari uwaba ashaka kumenya ubwenge? Niyitondere rero ibyo byose, maze azasobanukirwe n’ukuntu Uhoraho agira neza!