Read kinyarwanda Zaburi 108 Bible Online

Zaburi 108 - kinyarwanda bible

Zaburi 108

¹[124] Indirimbo. Ni zaburi iri mu zo bitirira Dawudi.

²Mana yanjye, umutima wanjye wasubiye mu gitereko, none reka ndirimbe, ncurange ibyishongoro; iryo ni ryo shema ryanjye.

³Kanguka, nanga y’imirya, nawe cyembe, maze nkangure umuseke!

⁴Uhoraho, nzagusingiriza no mu yindi miryango, ngucurangire aho ndi hose mu mahanga;

⁵kuko impuhwe zawe zikabakaba ku ijuru, n’ubudahemuka bwawe bugatumbagira mu bicu.

⁶Mana yanjye, baduka wemarare hejuru y’ijuru, ikuzo ryawe ritumbagire hejuru y’isi yose!

⁷Kugira ngo inkoramutima zawe zirokoke, dukirishe indyo yawe, maze udusubize.

⁸Imana yavugiye mu Ngoro yayo ntagatifu iti «Ndatsinze! Negukanye Sikemu, ntambagira umubande wa Sukoti!

⁹Gilihadi ibaye iyanjye, na Manase ni iyanjye; Efurayimu ihindutse ingofero y’icyuma nambaye ku mutwe, naho Yuda ni inkoni yanjye y’ubutegetsi,

¹⁰Mowabu yo ibaye igikarabiro niyuhagiriramo, inkweto zanjye nkazirambika kuri Edomu, ngakoma akamu, nteye Ubufilisiti.»

¹¹Ni nde uzanjyana mu mugi ucinyiye? Ni nde uzangeza muri Edomu?

¹²Nta wundi utari wowe, Mana yatuzinutswe, none ukaba utagitabarana n’ingabo zacu.

¹³Gira uze udutabare, udufashe kurwanya abanzi, kuko ubuvunyi buturuka ku bantu ari nta cyo bugeraho.

¹⁴Nituba kumwe n’Imana ni bwo tuzatsinda, ni yo izaribata abanzi bacu.