Read kinyarwanda Zaburi 11 Bible Online

Zaburi 11 - kinyarwanda bible

Zaburi 11

¹[13] Igenewe umuririmbisha. Iri mu zo bitirira Dawudi. Uhoraho ni we buhungiro bwanjye. Mushobora mute rero kumbwira ngo «Hungira ku musozi nk’akanyoni!»

²Dore abagiranabi babanze imiheto, baratamika imyambi yabo ku njishi, kugira ngo barasire intungane mu mwijima.

³Igihe igihugu cyose cyataye umuco, intungane yaba igishoboye iki kandi?

⁴Uhoraho ari mu Ngoro ye ntagatifu, Uhoraho afite intebe ye y’ubwami mu ijuru; ariko amaso ye ntayakura ku bantu, abasuzumisha indoro ye.

⁵Uhoraho anyurwa n’intungane, agahigika umugiranabi n’umunyarugomo.

⁶Abagiranabi azabamanuriraho umuriro n’amahindure! Inkubi y’umuyaga izabe umugabane ubakwiye.

⁷Koko rero Uhoraho ni intungane, agakunda ubutabera; ab’umutima uboneye ni bo bazamureba.