Read kinyarwanda Zaburi 111 Bible Online

Zaburi 111 - kinyarwanda bible

Zaburi 111

¹[127] Alleluya! Nzasingiza Uhoraho n’umutima wanjye wose, mu nteko y’intungane no mu ikoraniro rusange.

²Ibyo Uhoraho yakoze biratangaje, ababyitayeho bose bahugukira kubizirikana.

³Ibikorwa bye birangwa n’ubwiza n’ubudasumbwa, kandi ubutungane bwe bugahoraho iteka.

⁴Yashatse ko bagenda bibukiranya ibitangaza bye, Uhoraho ni umunyaneza n’umunyampuhwe.

⁵Abamwubaha abaha ibibatunga, akibuka iteka Isezerano rye.

⁶Umuryango we yaweretse ibikorwa bye bihambaye, igihe awugabiye ayandi mahanga ho umunani.

⁷Ibyo akora byose birangwa n’ukuri n’ubutungane, amategeko ye yose akwiye kwiringirwa.

⁸Yashyiriweho abo mu bihe byose kandi ku buryo budasubirwaho, akaba agenewe kubahirizwa nta buryarya n’ubuhemu.

⁹Uhoraho yazaniye umuryango we ikiwubohora, agena rimwe rizima imiterere y’Isezerano rye. Izina rye ni ritagatifu, kandi rigatera ubwoba.

¹⁰Intangiriro y’ubwenge ni ugutinya Uhoraho; abagenza batyo bose ni bo inararibonye. Ibisingizo bye bizahoraho iteka ryose.