Read kinyarwanda Zaburi 112 Bible Online

Zaburi 112 - kinyarwanda bible

Zaburi 112

¹[128] Alleluya! Hahirwa umuntu utinya Uhoraho, agahimbazwa n’amategeko ye!

²Urubyaro rwe ruzagira amaboko mu gihugu, ubwoko bw’abantu b’intungane bugire umugisha.

³Ubukungu n’umunezero bibarizwa iwe, n’ubutungane bwe buhoraho iteka.

⁴Mu gihe cy’umwijima, yaka nk’urumuri, rumurikira abantu b’intagorama. Koko impuhwe, ineza n’ubutungane, ni byo bimuranga.

⁵Hahirwa umuntu ugira impuhwe, kandi akaguriza abandi, ibintu bye aba abigengana ubutungane.

⁶Nta bwo azigera ahungabana bibaho, azasiga urwibutso rudasibangana.

⁷Ntakangaranywa n’ibihuha bibi, akomeza umutima akiringira Uhoraho,

⁸umutima we uhora mu gitereko, ntagire icyo yikanga, agashobora kwirebera uko abanzi be bigorerwa.

⁹Agira ubuntu, agaha abakene ataziganya; ubutungane bwe bugahoraho iteka, akagendana ishema n’ubwemarare.

¹⁰Umugomeramana, iyo amubonye, arajiginywa, agahekenya amenyo, agashenguka; ibyifuzo by’abagomeramana biburiramo.