Read kinyarwanda Zaburi 115 Bible Online

Zaburi 115 - kinyarwanda bible

Zaburi 115

¹[131] Nta bwo ari twebwe, Uhoraho, nta bwo ari twebwe, ahubwo ni izina ryawe ukwiye guhesha ishema, kubera urukundo n’ubudahemuka ugira.

²Ni iki cyatuma amahanga avuga ngo «Mbese Imana yabo iba hehe?»

³Imana yacu iba mu ijuru, icyo ishatse cyose ikagikora.

⁴Ibigirwamana byabo si ikindi, ni feza na zahabu, ni ibintu byabumbwe n’intoki za muntu.

⁵Bifite umunwa, ariko ntibivuge, bikagira amaso, ariko ntibibone;

⁶bifite amatwi, ariko ntibyumve, bikagira amazuru, ariko ntibihumurirwe;

⁷bifite ibiganza, ariko ntibikorakore, bikagira n’ibirenge, ariko ntibigende; nta jwi na busa riva mu muhogo wabyo.

⁸Ba nyir’ukubihanga barakamera nka byo, kimwe n’ababyiringira bose.

⁹Naho mwebwe, bana ba Israheli, nimwiringire Uhoraho: ni we muvunyi wanyu n’ingabo ibakingira!

¹⁰Abo mu nzu ya Aroni, nimwiringire Uhoraho: ni we muvunyi wanyu n’ingabo ibakingira!

¹¹Namwe abatinya Uhoraho, nimwiringire Uhoraho: ni we muvunyi wanyu n’ingabo ibakingira!

¹²Uhoraho aratuzirikana, azaduha umugisha! azaha umugisha inzu ya Israheli, azaha umugisha inzu ya Aroni,

¹³azaha umugisha abatinya Uhoraho, abaciye bugufi kimwe n’abakomeye.

¹⁴Uhoraho arabahe kugwira, mwebwe n’abana banyu!

¹⁵Murakagira umugisha w’Uhoraho, we waremye ijuru n’isi!

¹⁶Ijuru ni ijuru ry’Uhoraho, naho isi yayigabiye bene muntu.

¹⁷Abapfuye si bo basingiza Uhoraho, bo bamanukira mu gihugu cy’ubujunjame;

¹⁸naho twebwe abazima, turasingiza Uhoraho, kuva ubu ngubu ukazageza iteka ryose.