Read kinyarwanda Zaburi 116 Bible Online

Zaburi 116 - kinyarwanda bible

Zaburi 116

¹[132] Alleluya. Icyo nkundira Uhoraho, ni uko yumva ijwi ryanjye iyo mutakambiye,

²maze akunama, akantega amatwi; mu buzima bwanjye bwose sinzareka kumwiyambaza.

³Ingoyi z’urupfu zari zamboshye, imirunga y’ikuzimu yari yanjishe, ishavu n’agahinda byari byanyishe,

⁴maze niyambaza izina ry’Uhoraho, nti «Uhoraho, kiza amagara yanjye!»

⁵Uhoraho ni umunyampuhwe n’intarenganya, koko Imana yacu ni Nyir’imbabazi!

⁶Uhoraho aragira ab’intamenyekana; nari umunyantege nke, maze arantabara.

⁷Mutima wanjye, subira mu gitereko maze utuze, kuko Uhoraho yakugiriye neza cyane!

⁸Ubwo amagara yanjye wayakuye mu nzara z’urupfu, amaso yanjye ukayarinda amarira, n’ibirenge byanjye ukabirinda gutsitara,

⁹nzakomeza gutunganira Uhoraho ku isi y’abazima.

¹⁰Nagumanye icyizere, ndetse n’igihe navugaga nti «Ndi umunyabyago bikabije!»

¹¹Namara kugera kure kubi, nkajya mvuga nti «Abantu bose ni ababeshyi!»

¹²Ibyiza byose Uhoraho yangiriye, rwose nzabimwitura nte?

¹³Nzashyira ejuru inkongoro y’umukiro, kandi njye niyambaza izina ry’Uhoraho;

¹⁴nzarangiza amasezerano nagiriye Uhoraho imbere y’iteraniro ry’umuryango we wose.

¹⁵Koko Uhoraho ababazwa n’urupfu rw’abayoboke be!

¹⁶None rero, Uhoraho, wagiriye ko ndi umugaragu wawe, umugaragu wawe wabyawe n’umuja wawe, maze umbohora ku ngoyi!

¹⁷Nzagutura igitambo cy’ishimwe, kandi njye niyambaza izina ry’Uhoraho;

¹⁸nzarangiza amasezerano nagiriye Uhoraho, imbere y’iteraniro ry’umuryango we wose,

¹⁹mu ngombe z’Ingoro y’Uhoraho, muri wowe nyirizina, Yeruzalemu!