Read kinyarwanda Zaburi 118 Bible Online

Zaburi 118 - kinyarwanda bible

Zaburi 118

¹[134] Alleluya! Nimusingize Uhoraho, kuko ari umugwaneza, kandi urukundo rwe rugahoraho iteka!

²Imiryango ya Israheli nibivuge ibisubiremo, iti «Urukundo rwe ruhoraho iteka!»

³N’inzu ya Aroni nibivuge ibisubiremo, iti «Urukundo rwe ruhoraho iteka!»

⁴N’abatinya Uhoraho nibabivuge babisubiremo, bati «Urukundo rwe ruhoraho iteka!»

⁵Mu magorwa yanjye, natakiye Uhoraho, maze Uhoraho aranyumva, anshyira ahantu hagutse.

⁶Uhoraho turi kumwe, nta cyantera ubwoba: umuntu wagira icyo antwara yaturuka he?

⁷Uhoraho turi kumwe, arantabara, maze abanzi banjye nkabarebana akajogo.

⁸Ibyiza ni ukwisunga Uhoraho, aho kwiringira abantu!

⁹Ibyiza ni ukwisunga Uhoraho, aho kwiringira abanyamaboko.

¹⁰Amahanga yose yari yantangatanze, ariko ku izina ry’Uhoraho ndayatsemba!

¹¹Bari bantangatanze impande zose, ariko ku izina ry’Uhoraho ndabatsemba!

¹²Bari bantangatanze nk’amarumbo y’inzuki, ariko bazima nk’umuriro w’ibitovu, kuko ku izina ry’Uhoraho nabatsembye!

¹³Bashatse kumpirika ngo bangushe, ariko Uhoraho arantabara.

¹⁴Uhoraho ni we mbaraga zanjye n’icyivugo cyanjye; ni we nkesha agakiza kose!

¹⁵Impundu z’ibyishimo n’iz’ubutsinzi, nizihore zivuga mu ngo z’ab’intungane, baririmbe bati «Indyo y’Uhoraho yagaragaje ibigwi!

¹⁶Indyo y’Uhoraho yarihanukiriye, maze indyo y’Uhoraho igaragaza ibigwi!»

¹⁷Oya, nta bwo nzapfa, ahubwo nzaramba, maze mpore namamaza ibikorwa by’Uhoraho.

¹⁸Ni koko Uhoraho yari yampaye igihano gikaze, ariko ntiyagejeje aho kungabiza urupfu!

¹⁹None nimunkingurire imiryango nyabutungane, maze ninjire, nshimire Uhoraho!

²⁰Dore irembo rigana Uhoraho aho riherereye: ab’intungane ni bo baryinjiramo!

²¹Reka ngusingize, Nyagasani, kuko wanyumvise, maze ukambera umukiza!

²²Ibuye abubatsi bari barajugunye, ni ryo ryahindutse ibuye ry’insanganyarukuta !

²³Uhoraho ni we wagennye ko biba bityo, maze biba agatangaza mu maso yacu.

²⁴Nguyu umunsi Uhoraho yigeneye: nutubere umunsi w’ibirori n’ibyishimo.

²⁵Emera, Uhoraho, emera utange umukiro! Emera, Uhoraho, emera utange umutsindo!

²⁶Nihasingizwe uje mu izina ry’Uhoraho! Tubifurije umugisha mu Ngoro y’Uhoraho!

²⁷Uhoraho ni Imana, aratumurikira. Cyo nimukorane, mutambagire mufite amashami mu ntoki, murinde mugera ku mpembe z’urutambiro.

²⁸Ni wowe Imana yanjye, ndagushimira, Mana yanjye, ndakurata.

²⁹Nimusingize Uhoraho, kuko ari umugwaneza, kandi urukundo rwe rugahoraho iteka!