Read kinyarwanda Zaburi 119 Bible Online

Zaburi 119 - kinyarwanda bible

Zaburi 119

¹[135] Hahirwa abadakemwa mu mibereho yabo, bagakurikiza amategeko y’Uhoraho!

²Hahirwa abumvira ibyemezo bye, bakamushakashaka babikuye ku mutima!

³Abo birinda gukora ikibi, ahubwo bagakurikira inzira ze.

⁴Ni wowe witangarije amabwiriza, ugira ngo bayakurikize ubutayahuga.

⁵Icyampa ngo inzira zanjye zihame, kugira ngo nkurikize ugushaka kwawe!

⁶Ubwo rero sinzagira isoni zo kurangamira amategeko yawe yose.

⁷Nzagushimagiza n’umutima uboneye maze kumenya amateka atunganye uciye.

⁸Ugushaka kwawe nzagukurikiza, ntuzantererane bibaho.

⁹Mbese ukiri muto yaba indakemwa ate mu nzira ye? Yabigeraho akurikiza ijambo ryawe.

¹⁰Ndagushakashakana umutima wanjye wose, ntuncishe ukubiri n’amategeko yawe.

¹¹Amasezerano yawe nayikomeje mu mutima, ngira ngo ntagucumuraho.

¹²Uragasingizwa, Uhoraho! Umenyeshe ugushaka kwawe.

¹³Mpora ntondagura amateka yose waciye.

¹⁴Mpimbazwa no gukurikiza ibyemezo byawe kuruta uko ubukire butera ibyishimo.

¹⁵Nzazirikana amabwiriza yawe, maze ndangamire inzira zawe.

¹⁶Nzahimbazwa n’ugushaka kwawe, noye kuzibagirwa ijambo ryawe.

¹⁷Ugirire ubuntu umugaragu wawe, nzabeho, maze nzakurikize ijambo ryawe.

¹⁸Mpumura amaso maze nzirebere ibyiza by’amategeko yawe.

¹⁹Ndi umushyitsi ku isi, ntumpishe imigambi yawe.

²⁰Umutima wanjye wazonzwe no guhora nifuza kumenya amateka uciye.

²¹Ukangara ibivume by’abirasi bagendera kure y’amategeko yawe.

²²Urandinde igitutsi n’agasuzuguro, kuko nakurikije ibyemezo byawe.

²³N’aho ibikomangoma byakorana bikamvuga nabi, umugaragu wawe ahora azirikana ugushaka kwawe.

²⁴Ibyemezo byawe bintera guhimbarwa, imigambi yawe ni yo mfatiraho inama.

²⁵Dore ndambaraye mu mukungugu, umbesheho ukurikije ijambo ryawe.

²⁶Nakugaragarije inzira zanjye, nawe uransubiza, unyigishe ugushaka kwawe.

²⁷Unyumvishe inzira y’amabwiriza yawe, kugira ngo njye nzirikana ibyiza byawe.

²⁸Umutima wanjye urashengurwa n’agahinda, unzahure ukurikije ijambo ryawe.

²⁹Urandinde inzira y’ikinyoma, maze ungirire ubuntu, umpe amategeko yawe.

³⁰Nahisemo kutazagutenguha, nsobanukirwa n’amateka yawe.

³¹Nakomeye ku byemezo byawe, Uhoraho, ntuzankoze isoni!

³²Inzira y’amatangazo yawe irambangukiye, kuko waguye umutima wanjye.

³³Uhoraho, unyigishe inzira y’ugushaka kwawe, kugira ngo nyikomeze kugera mu ndunduro.

³⁴Umpe ubwenge, kugira ngo nkomeze amategeko yawe, maze nyakurikize n’umutima wanjye wose.

³⁵Unkomeze mu nzira y’amatangazo yawe, kuko ari yo anezereje.

³⁶Werekeze umutima wanjye ku byemezo byawe, aho kohoka ku maronko.

³⁷Amaso yanjye uyarinde ibitagirashinge, unkomeze mu nzira zawe.

³⁸Ukomereze umugaragu wawe isezerano, wateganyirije abayoboke bawe.

³⁹Undinde igitutsi kintera ubwoba, kuko amateka uciye ari yo nyuramutima.

⁴⁰Icy’ingenzi nifuza ni ugukurikiza amabwiriza yawe, untungishe ubutungane.

⁴¹Uhoraho, ubuntu bwawe nibunsendere, unkize nk’uko wabisezeranye!

⁴²Sinzabure icyo nsubiza abantuka, kuko niringiye ijambo ryawe.

⁴³Ntunkure mu kanwa ijambo ry’ukuri, kuko niringiye amateka waciye.

⁴⁴Ndashaka gukurikiza amategeko yawe, iteka ryose rizira iherezo.

⁴⁵Nzagire ubuzima buzira inkomyi, kuko nibanda ku mabwiriza yawe.

⁴⁶Nzatangariza ibyemezo byawe, imbere y’abami, nta soni mfite.

⁴⁷Amatangazo yawe yaranyuze, narayakunze cyane.

⁴⁸Nerekeje ibiganza byanjye ku matangazo yawe yanyuze, maze nzazirikane ugushaka kwawe.

⁴⁹Wibuke ijambo wabwiye umugaragu wawe, ari na ryo nakomeje kwizera.

⁵⁰Ikintera ihumure mu byago byanjye, ni ijambo ryawe rizambeshaho.

⁵¹N’ubwo abirasi bansetse bikabije, sinigeze nteshuka ku mategeko yawe.

⁵²Ndibuka amateka waciye kera, Uhoraho, maze bikantera guhumurizwa.

⁵³Nshengurwa n’uburakari imbere y’abakwihakana, batandukiriye amategeko yawe.

⁵⁴Imigambi yawe ni yo ndirimbo yanjye mu nzu ntuyemo bushyitsi.

⁵⁵Uhoraho, nijoro nibuka izina ryawe, kandi ngakurikiza amategeko yawe.

⁵⁶Mu by’ukuri icyo ngenewe ni ugukurikiza amabwiriza yawe.

⁵⁷Uhoraho, ndabivuze: umugabane wanjye ni ugukurikiza ijambo ryawe.

⁵⁸Ndashaka kukunyura n’umutima wanjye wose, umbabarire nk’uko wabisezeranye!

⁵⁹Nasuzumye imibereho yanjye, nkaba nshaka kugarukira ibyemezo byawe.

⁶⁰Nshishikariye ndatindiganyije gukurikiza amatangazo yawe.

⁶¹Nkikijwe n’imitego y’abagiranabi, ariko sinibagiwe amategeko yawe.

⁶²Rwagati mu ijoro ndabyuka ngo ngushimire, ku mpamvu y’amateka atunganye waciye.

⁶³Nifatanyije n’abagutinya bose, bagakurikiza amabwiriza yawe.

⁶⁴Uhoraho, isi isendereye impuhwe zawe, unyigishe ugushaka kwawe.

⁶⁵Wagiriye neza umugaragu wawe, Uhoraho, ukurikije ijambo ryawe.

⁶⁶Unyigishe ibyiza by’ubushishozi n’ubumenyi, kuko niringiye amatangazo yawe.

⁶⁷Mbere yo gucishwa bugufi, narayobagurikaga, naho ubu ngubu, nkurikiza amasezerano yawe.

⁶⁸Uri umugwaneza n’umugiraneza, unyigishe ugushaka kwawe.

⁶⁹Abirasi baranyandavurisha ibinyoma, ariko jyewe, nkurikiza amabwiriza yawe mbikuye ku mutima.

⁷⁰Umutima wabo wazibiranywe n’ikinure, naho jyewe ngahimbazwa n’amategeko yawe.

⁷¹Byanguye neza kuba naracishijwe bugufi, kugira ngo nitoze ugushaka kwawe.

⁷²Amategeko y’umunwa wawe andutira ibihumbi by’amasikeli ya zahabu na feza.

⁷³Ibiganza byawe byarandemye, maze birankomeza, umpe ubwenge, ngo nitoze amatangazo yawe.

⁷⁴Abagutinya nibandeba, bazishima, kuko nizeye ijambo ryawe.

⁷⁵Uhoraho, nzi ko amateka waciye atunganye, kandi nta bwo wibeshye uncisha bugufi.

⁷⁶Urukundo rwawe ni rwo rwampoza, nk’uko wabisezeranije umugaragu wawe.

⁷⁷Impuhwe zawe nizincengere maze mbeho, kuko amategeko yawe antera ubwuzu.

⁷⁸Abirasi banyicisha ibinyoma nibakorwe n’ikimwaro, jyewe nzirikana amabwiriza yawe.

⁷⁹Abagutinya nibangarukire, bazamenye ibyemezo byawe.

⁸⁰Umutima wanjye nuberwe no gukora icyo ushaka, bityo sinzakorwa n’ikimwaro.

⁸¹Umutima wanjye uhangarije agakiza kawe, nizeye ijambo ryawe.

⁸²Amaso yanjye ahangarije amasezerano yawe, nibaza nti «Mbese uzampoza ryari?»

⁸³Nari meze nk’uruhago rutaze ku mwotsi, cyakora sinibagiwe ugushaka kwawe.

⁸⁴Mbese iminsi uteganyirije umugaragu wawe ingana iki? Kandi uzacira ryari urubanza abantoteza?

⁸⁵Abirasi barancukurira imyobo, batitaye ku mategeko yawe.

⁸⁶Amatangazo yawe yose ni ukuri, barantotereza ubusa, urantabare.

⁸⁷Narabandagaye, nsa n’ureba ikuzimu, cyakora sinateshutse ku mabwiriza yawe.

⁸⁸Girira ubuntu bwawe, umbesheho, nzakurikize ibyemezo wivugiye.

⁸⁹Uhoraho, iteka ryose ijambo ryawe rihoraho mu ijuru.

⁹⁰Ukuri kwawe guhoraho kuva mu gisekuruza kujya mu kindi; isi wayishinze ubutajegajega.

⁹¹Kugeza uyu munsi, byose biracyariho uko wabishatse, kuko isi yose ikugaragiye.

⁹²Iyaba amategeko yawe atari anteye ubwuzu, mba narahitanywe n’ibyago.

⁹³Sinzigera nibagirwa amabwiriza yawe, kuko ari yo untungishije.

⁹⁴Ndi uwawe, unyirokorere, kuko ndangamiye amabwiriza yawe.

⁹⁵Abagiranabi barashaka icyankuraho, jyewe nkomeza guhugukira ibyemezo byawe.

⁹⁶N’aho byose byaba biboneye, bigira iherezo, ariko amatangazo yawe ntagira urubibi!

⁹⁷Mbega ukuntu nkunda amategeko yawe! Iminsi yose ndayazirikana.

⁹⁸Amatangazo yawe ni yo bukire bwanjye igihe cyose, yanyigishije ubwenge butambutse ubw’abanzi banjye.

⁹⁹Ubujijuke mburusha abarezi banjye bose, kuko nakunze kuzirikana ibyemezo byawe.

¹⁰⁰Ndusha abasaza gusobanukirwa, kuko numviye amabwiriza yawe yose.

¹⁰¹Nanze gukurikira inzira zose z’ikibi, kugira ngo nkomeze ijambo ryawe.

¹⁰²Nta bwo nacishije ukubiri n’amateka waciye, kuko ari wowe uyantoza.

¹⁰³Mbega ngo amasezerano yawe arandyohera, kurusha ubuki mu kanwa kanjye!

¹⁰⁴Amabwiriza yawe yampaye gusobanukirwa, bituma nanga inzira zose z’ibinyoma.

¹⁰⁵Ijambo ryawe rimurikira intambwe zanjye, rikaboneshereza inzira yanjye.

¹⁰⁶Narahiriye gukurikiza amateka atunganye waciye, kandi ni na ko nzabikomeza.

¹⁰⁷Nacishijwe bugufi bikabije, Uhoraho, umbesheho nk’uko wabisezeranye.

¹⁰⁸Uhoraho, wakire amasengesho ngutuye, maze unyigishe amateka waciye.

¹⁰⁹Amagara yanjye asa nahora ancika, ariko sinibagirwe amategeko yawe.

¹¹⁰Abagiranabi banshandikiye umutego, ariko sinahuga ngo nitaze ibyo wantegetse.

¹¹¹Ibyemezo byawe ni byo murage wanjye, ni na byo byishimo by’umutima wanjye.

¹¹²Nshishikajwe no gukurikiza ugushaka kwawe, ni cyo gihembo cyanjye iteka ryose.

¹¹³Nanga imitima ijajanganya, maze ngakunda amategeko yawe.

¹¹⁴Ni wowe buhungiro bwanjye n’ingabo yanjye, niringiye ijambo ryawe.

¹¹⁵Bagiranabi, nimumve iruhande, kugira ngo nkomeze amatangazo y’Imana yanjye.

¹¹⁶Unshyigikire ukurikije amasezerano yawe, kugira ngo mbeho, ntukoze isoni amizero yanjye.

¹¹⁷Untere imbaraga kugira ngo ndokoke, nzarangamire ubudahwema ugushaka kwawe.

¹¹⁸Abadakora icyo ushaka urabahigika, kuko ibyo bigira byose ari ibinyoma.

¹¹⁹Abagiranabi bose b’isi, wabagize ibiseswa, ni cyo gituma nkunda ibyemezo byawe.

¹²⁰Umubiri wanjye uradagadwa kubera kugutinya, kandi amateka uciye antera ubwoba.

¹²¹Nakoranye umurava n’ubutabera, ntunyegurire abanyisha agahato.

¹²²Unyizeze ko byose bizantunganira, maze abirasi boye kunshikamira.

¹²³Amaso yanjye ahangarije agakiza kawe, n’ijambo ryawe ry’ubutabera.

¹²⁴Ugenzereze umugaragu wawe ukurikije impuhwe zawe, maze unyigishe amategeko yawe.

¹²⁵Ndi umugaragu wawe, umpe ubwenge, kugira ngo menye neza imigambi yawe.

¹²⁶Uhoraho, amagingo arageze ngo uhaguruke, kuko barenze ku mabwiriza yawe.

¹²⁷Ni cyo gituma nkunda amategeko yawe, kurusha zahabu, ndetse zahabu iyunguruye.

¹²⁸Ni cyo cyatumye nsanga amatangazo yawe atunganye, nkanga imigirire yose y’ububeshyi.

¹²⁹Amategeko yawe ni agatangaza, ni cyo gituma umutima wanjye uyakomeyeho.

¹³⁰Guhishura amagambo yawe ni urumuri, abiyoroshya akabaha ubwenge.

¹³¹Mbumbuye umunwa wanjye ngo miragure, kuko mfite inyota y’amatangazo yawe.

¹³²Hindukira undebe maze ungirire ibambe, nk’uko wabiteganyirije abagukunda.

¹³³Intambwe zanjye uzikomereshe amategeko yawe, ntureke ubukozi bw’ibibi bunyigarurira.

¹³⁴Unkize abantu banshikamiye, kugira ngo nkurikize amabwiriza yawe.

¹³⁵Umurikishe uruhanga rwawe ku mugaragu wawe, kandi unyigishe amategeko yawe.

¹³⁶Amarira arashoka mu maso yanjye, kuko badakurikiza amabwiriza yawe.

¹³⁷Uhoraho, uri umunyabutungane, ukaba intarenganya mu bucarubanza bwawe.

¹³⁸Washyizeho amategeko yawe mu butabera, ugaragaza ukuri gushyitse.

¹³⁹Ishyaka ry’uburakari rirangurumanamo, kuko abanzi banjye bibagirwa ijambo ryawe.

¹⁴⁰Ijambo ryawe rizira ihinyu, kandi umugaragu wawe ararikunda.

¹⁴¹N’ubwo ndi intamenyekana n’insuzugurwa, sinigeze nibagirwa amategeko yawe.

¹⁴²Ubutabera bwawe buhoraho iteka ryose, kandi amategeko yawe ni ukuri kudakuka.

¹⁴³Ishavu n’ihagarikamutima byamfashe, ariko amatangazo yawe yo antera ubwuzu.

¹⁴⁴Ibyemezo byawe ni ubutabera bw’iteka ryose, umpere ubwenge kubyumva maze nzabeho.

¹⁴⁵Uhoraho, ndagutabaza n’umutima wanjye wose, unsubize; ndashaka gukurikiza ugushaka kwawe.

¹⁴⁶Ndagutakambiye, urantabare, kugira ngo nkomeze ibyemezo byawe.

¹⁴⁷Mbere y’umuseke mba ngutabaza, nizeye icyo uri buvuge.

¹⁴⁸Mba nkanuye mbere y’uko bucya, kugira ngo nzirikane amasezerano yawe.

¹⁴⁹Uhoraho, wumve ijwi ryanjye, kuko uri umunyampuhwe, umbesheho ukurikije amateka waciye.

¹⁵⁰Inkozi z’ibibi zintoteza ziransatiriye, amategeko yawe ziyagendera kure.

¹⁵¹Wowe, Uhoraho, undi hafi, kandi amatangazo yawe ni yo y’ukuri.

¹⁵²Kuva kera namenye ko ibyemezo byawe, wabishingiye kuzahoraho iteka.

¹⁵³Reba ubutindi bwanjye, maze undokore, kuko ntibagiwe amategeko yawe.

¹⁵⁴Burana urubanza rwanjye, maze ungobotore, undwaneho ukurikije amasezerano yawe.

¹⁵⁵Abagiranabi umukiro ubari kure, kuko batumvira ugushaka kwawe.

¹⁵⁶Uhoraho, impuhwe zawe ni igisagirane, umbesheho ukurikije amateka waciye.

¹⁵⁷Abantoteza n’abanzi banjye ntibagira ingano, ariko sinateshutse ku byemezo byawe.

¹⁵⁸Nshenguka umutima iyo mbonye abahakanyi, kuko badakurikiza amasezerano yawe.

¹⁵⁹Reba ukuntu nkunda amabwiriza yawe, Uhoraho, umbesheho ukurikije impuhwe zawe.

¹⁶⁰Mbere ya byose ijambo ryawe ni ukuri: n’amateka waciye aratunganye kandi azahoraho iteka.

¹⁶¹Ibikomangoma biranyikomye nta mpamvu, ariko amagambo yawe yonyine ni yo mfitiye igitinyiro.

¹⁶²Nshimishwa n’amasezerano yawe, nk’uwabonye iminyago itabarika.

¹⁶³Nanga ikinyoma urunuka, ariko ngakunda amategeko yawe.

¹⁶⁴Ngusingiza karindwi mu munsi, ku mpamvu y’amateka atunganye waciye.

¹⁶⁵Abakunda amategeko yawe bagira amahoro yuzuye, kuri bo nta kibakoma imbere.

¹⁶⁶Uhoraho, nizeye uburokozi bwawe, kandi nakurikije amatangazo yawe.

¹⁶⁷Nkurikiza ibyemezo byawe mbikuye ku mutima, maze nkabikunda bihebuje.

¹⁶⁸Nkurikiza amatangazo n’ibyemezo byawe, kandi ibyo nkora byose uba ubibona.

¹⁶⁹Uhoraho, induru mvuza ikugereho, umpe ubwenge ukurikije ijambo ryawe.

¹⁷⁰Ugutakamba kwanjye nikugere imbere yawe, undokore ukurikije amasezerano yawe.

¹⁷¹Umunwa wanjye wamamaza ibisingizo byawe, kuko umenyesha ugushaka kwawe.

¹⁷²Ururimi rwanjye niruhimbaze amasezerano yawe, kuko amatangazo yawe yose atunganye.

¹⁷³Ikiganza cyawe nikimbere ikiramiro, kuko nahisemo amabwiriza yawe.

¹⁷⁴Uhoraho, icyo nifuza ni uko wandokora, kandi amategeko yawe antera ibyishimo.

¹⁷⁵Icyampa ngo mbereho kugusingiza, maze amateka waciye ambere ikiramiro.

¹⁷⁶Ndabungera nk’intama yazimiye; ngwino utarure umugaragu wawe, kuko ntibagiwe amatangazo yawe.