Read kinyarwanda Zaburi 136 Bible Online

Zaburi 136 - kinyarwanda bible

Zaburi 136

¹[152] Alleluya! Nimushimire Uhoraho, kuko ari umugwaneza, kuko urukundo rwe ruhoraho iteka.

²Nimushimire Imana isumba izindi zose, kuko urukundo rwe ruhoraho iteka.

³Nimushimire Umutegetsi w’abategetsi, kuko urukundo rwe ruhoraho iteka.

⁴Ni we wenyine wakoze ibintu by’agatangaza, kuko urukundo rwe ruhoraho iteka,

⁵arema ijuru abigiranye ubuhanga, kuko urukundo rwe ruhoraho iteka,

⁶akomeza ubutaka hejuru y’amazi, kuko urukundo rwe ruhoraho iteka.

⁷Ni we wahanze imuri nini, kuko urukundo rwe ruhoraho iteka,

⁸arema izuba ngo rigenge amanywa, kuko urukundo rwe ruhoraho iteka,

⁹arema ukwezi n’inyenyeri ngo bigenge ijoro, kuko urukundo rwe ruhoraho iteka.

¹⁰Ni we washegeshe Misiri yica uburiza bwayo, kuko urukundo rwe ruhoraho iteka,

¹¹maze ahavana Abayisraheli, kuko urukundo rwe ruhoraho iteka,

¹²abigiranye ububasha n’ukuboko kureze, kuko urukundo rwe ruhoraho iteka.

¹³Ni we wasatuyemo kabiri inyanja y’Urufunzo, kuko urukundo rwe ruhoraho iteka,

¹⁴maze ayinyuzamo Abayisraheli, kuko urukundo rwe ruhoraho iteka,

¹⁵ayirohamo Farawo n’ingabo ze, kuko urukundo rwe ruhoraho iteka.

¹⁶Nuko yiyoborera umuryango we mu butayu, kuko urukundo rwe ruhoraho iteka,

¹⁷abatsindira abami bakomeye cyane, kuko urukundo rwe ruhoraho iteka,

¹⁸arimbura abami b’ibihangange, kuko urukundo rwe ruhoraho iteka,

¹⁹barimo Sihoni, umwami w’Abahemori, kuko urukundo rwe ruhoraho iteka,

²⁰na Ogi, umwami wa Bashani, kuko urukundo rwe ruhoraho iteka.

²¹Maze ibihugu byabo abibahaho umunani, kuko urukundo rwe ruhoraho iteka,

²²umunani yageneye Israheli, umuyoboke we, kuko urukundo rwe ruhoraho iteka.

²³Ni we watwibutse igihe twari ducishijwe bugufi, kuko urukundo rwe ruhoraho iteka,

²⁴maze atugobotora abanzi bacu, kuko urukundo rwe ruhoraho iteka.

²⁵Ibiremwa byose abiha ikibitunga, kuko urukundo rwe ruhoraho iteka.

²⁶Nimushimire Imana iganje mu ijuru, kuko urukundo rwe ruhoraho iteka!