Read kinyarwanda Zaburi 140 Bible Online

Zaburi 140 - kinyarwanda bible

Zaburi 140

¹[156] Igenewe umuririmbisha. Ni zaburi iri mu zo bitirira Dawudi.

²Uhoraho, nkiza umuntu w’umugiranabi, undinde n’abanyarugomo,

³ba bandi bahora bazirikana kugira nabi, buri munsi bagasembura intambara;

⁴bagatyaza ururimi rwabo nk’urw’inzoka, bagahora bajunditse mu kanwa ubumara nk’ubw’impiri. (guceceka akanya gato)

⁵Uhoraho, ntutume ngwa mu maboko y’umugiranabi, undinde n’abanyarugomo, ba bandi bahora bazirikana icyangusha.

⁶Abirasi banteze umutego ngo bamfatiremo, babohanyije imigozi barayishandika, maze ku nzira nyuramo bahaca ibico. (guceceka akanya gato)

⁷Nuko mbwira Uhoraho, nti «Ni wowe Imana yanjye! Uhoraho, tega amatwi, wumve ijwi ryanjye rigutakambira!»

⁸Nyagasani Mana yanjye, wowe mbaraga nkesha agakiza kose, urarinde umutwe wanjye ku munsi w’intambara.

⁹Uhoraho, ntuzemerere umugiranabi icyo yifuza, ntuzareke imigambi ye imushobokera, naho ubundi yakwishyira hejuru. (guceceka akanya)

¹⁰Abantangatanze hose bamvuga nabi, iyo nabi irakabahama!

¹¹Barakanyagirwa n’amakara yaka, barohwe mu muriro, mu nyenga batazashobora kuvamo!

¹²Abanyakarimi kabi ntibakabeho mu gihugu; umuntu w’umunyarugomo n’umugiranabi, ibyago birakamujujubya ubudahwema.

¹³Nzi ko Uhoraho azarenganura abanyakababaro, akazarengera abakene.

¹⁴Nuko intungane zizogeze izina ryawe, abantu b’intagorama bature imbere yawe.