Read kinyarwanda Zaburi 143 Bible Online

Zaburi 143 - kinyarwanda bible

Zaburi 143

¹[159] Ni zaburi iri mu zo bitirira Dawudi. Uhoraho, umva isengesho ryanjye, tega amatwi amaganya yanjye, maze unsubize ukurikije ubudahemuka n’ubutungane byawe!

²Ntushyire umuyoboke wawe mu rubanza, kuko imbere yawe nta n’umwe waba umwere.

³Hari umwanzi unyibasiye, ubugingo bwanjye arabukunenga hasi, dore aranyohera mu mwijima, mu bapfuye bo mu gihe cya kera.

⁴Sinkigira akuka, umutima wanjye wahahamutse.

⁵Ndibuka iminsi yo hambere, nkazirikana ibyo wakoze byose, ngatekereza ibikorwa by’amaboko yawe,

⁶maze nkarambura ibiganza mbikwerekejeho: kuko imbere yawe meze nk’ubutaka bwumiranye. (guceceka akanya gato)

⁷Gira unsubize, Uhoraho, dore nta cyo nkishoboreye! Ntumpishe uruhanga rwawe, naho ubundi namera nk’abamanurirwa mu mva.

⁸Ngaragariza impuhwe zawe kuva mu gitondo, kuko ari wowe niringiye. Menyesha inzira ngomba kunyura, dore ni wowe ndangamiye.

⁹Uhoraho, nkiza abanzi banjye, dore ni wowe nashatseho ubuhungiro.

¹⁰Nyigisha kujya nkora icyo ushaka, kuko ari wowe Mana yanjye. Umwuka wawe mwiza, unjyane ahantu hategamye.

¹¹Uhoraho, uzagirira izina ryawe umbesheho; uzagirira ubutungane bwawe umvane mu kaga ndimo;

¹²uzagirira impuhwe zawe urimbure abanzi banjye, kandi utsembe abanyibasiye bose, kuko ndi umuyoboke wawe.