Read kinyarwanda Zaburi 145 Bible Online

Zaburi 145 - kinyarwanda bible

Zaburi 145

¹[161] Igisingizo, cyitiriwe Dawudi. Mana yanjye, mwami wanjye, nzakurata, nzasingiza izina ryawe iteka ryose.

²Buri munsi nzagusingiza, nogeze izina ryawe iteka ryose.

³Uhoraho ni igihangange, akaba rwose akwiriye gusingizwa; ubwamamare bwe ntibugereranywa.

⁴Kuva mu gisekuru kugera mu kindi bazibukiranye ibyo wakoze, bamamaze ibigwi byawe.

⁵Nzajya ndondorera abandi ibitangaza byawe, mvuge ikuzo ryawe ry’urukerereza, rijyana n’ubwiza bwawe.

⁶Bazajya bavuga ububasha bwawe, wagaragaje ukora ibintu bihambaye, nanjye mvuge ubuhangange bwawe.

⁷Bazajya bahimbaza urwibutso rw’ibyiza byinshi wagiriye abantu, maze bahe amashyi n’impundu ubutungane bwawe.

⁸Uhoraho ni umunyampuhwe n’umunyaneza, atinda kurakara kandi akagira urugwiro.

⁹Uhoraho agirira bose ibambe, maze imbabazi ze zigasakara ku biremwa bye byose.

¹⁰Uhoraho, ibiremwa byawe byose nibijye bigushima, abayoboke bawe bagusingize!

¹¹Bazarate ikuzo ry’ingoma yawe, batangaze ubushobozi bwawe,

¹²bamenyeshe bene muntu ibigwi byawe, n’ikuzo ritamanzuye ry’ingoma yawe.

¹³Ingoma yawe ni ingoma ihoraho mu bihe byose, ubutegetsi bwawe buzaramba, uko ibisekuruza bigenda bisimburana. Uhoraho ni mutabeshya, akaba indahemuka mu byo akora byose.

¹⁴Uhoraho aramira abagwa bose, abunamiranye akabaha kwemarara.

¹⁵Bose ni wowe bahanga amaso bakwiringiye, maze ukabaha icyo barya igihe kigeze.

¹⁶Ubumbura ikiganza cyawe, maze ibinyabuzima byose ukabihaza icyo byifuza.

¹⁷Uhoraho ni umunyabutungane mu nzira ze zose, akarangwa n’urukundo mu bikorwa bye byose.

¹⁸Uhoraho aba hafi y’abamwiyambaza, hafi y’abamwiyambaza babikuye ku mutima.

¹⁹Ibyo abamwubaha bashaka arabikora; baba bamutabaje, akabumva, akabagoboka.

²⁰Uhoraho arinda abamukunda bose, ariko abagiranabi bose akazabarimbura.

²¹Umunwa wanjye uzavuga ibisingizo by’Uhoraho, n’ikinyamubiri cyose kizarate izina rye ritagatifu, iteka ryose rizira iherezo!