Read kinyarwanda Zaburi 147 Bible Online

Zaburi 147 - kinyarwanda bible

Zaburi 147

¹[163] Alleluya! Mbega ukuntu ari byiza kuririmba Imana yacu, ntibigire uko bisa kuyisingiza uko bikwiye!

²Uhoraho, we wubatse Yeruzalemu bundi bushya, azakorakoranya impabe za Israheli.

³Ni we ukiza abafite intimba ku mutima, maze akomora ibikomere byabo.

⁴Amenya kubarura inyenyeri zibaho, akazivuga zose mu mazina yazo.

⁵Umutegetsi wacu ni igihangange n’umunyamaboko, ubwenge bwe ntibugira urugero.

⁶Uhoraho ashyigikira ab’intamenyekana, naho abagome akabacisha bugufi.

⁷Nimuhanikire Uhoraho indirimbo imushimagiza, mucurangire Imana yacu umurya w’inanga,

⁸We utera ibicu kubudika ku ijuru, agategurira ubutaka imvura, akameza ubwatsi ku misozi n’ibimera bifitiye abantu akamaro;

⁹ateganyiriza amatungo ibiyatunga, n’ibyana by’icyiyone bigabuza.

¹⁰Imbaraga z’ifarasi si zo zimushimisha, n’impfundiko z’uwiruka si zo yitaho;

¹¹uhubwo Uhoraho anyurwa n’abamwubaha, akanezerezwa n’abiringira impuhwe ze.

¹²Yeruzalemu, amamaza Uhoraho, Siyoni, singiza Imana yawe!

¹³Kuko yakajije ibihindizo by’amarembo yawe, agaha umugisha abana bawe bagutuyemo.

¹⁴Yasakaje amahoro mu bwatsi bwawe, aguhaza inkongote y’ingano zeze neza.

¹⁵Yoherereza amategeko ye ku isi, ijambo rye rikihuta bitangaje.

¹⁶Anyanyagiza umurama w’urubura, ukagira ngo ni ibizingo by’ubwoya bw’intama, agasanzagiza ikime cy’inyababa, ukaba wagira ngo ni ivu.

¹⁷Urubura arujugunyanga nk’utuvungukira, ntihagire uwihanganira ubwo bukonje.

¹⁸Ubundi yabitegeka, bigahita bishonga, agahuhisha umuyaga we, amazi agatemba.

¹⁹Amenyesha bene Yakobo ijambo rye, agatangariza Israheli amategeko ye.

²⁰Nta yandi mahanga yigeze agenzereza atyo, ngo ayamenyeshe amateka ye.