Read kinyarwanda Zaburi 148 Bible Online

Zaburi 148 - kinyarwanda bible

Zaburi 148

¹[164] Alleluya! Nimusingirize Uhoraho mu ijuru, mumusingize mwebwe abatuye hejuru y’ibicu!

²Nimumusingize, bamalayika be mwese, namwe, ngabo ze mwese nimumusingize!

³Nimumusingize, zuba nawe kwezi, mumusingize, nyenyeri zose zakirana!

⁴Juru ryisumbuye ayandi, ngaho musingize, nawe mazi yo hejuru y’ikirere!

⁵Byose nibisingize izina ry’Uhoraho, we wategetse bigahita bibaho;

⁶yabishyize mu myanya bizahoramo iteka, abishingira amategeko atazigera akuka.

⁷Nimusingize Uhoraho, namwe biremwa byo ku isi: bisimba byo mu nyanja no mu bizenga,

⁸muriro n’amahindu, rubura n’ibihu, nawe muyaga w’inkubi usohoza ijambo rye.

⁹Nimumusingize misozi mwese n’utununga, namwe biti byera imbuto n’amasederi yose;

¹⁰nyamaswa z’ishyamba n’amatungo yo mu ngo, nyoni zo mu kirere n’ibikururuka hasi!

¹¹Nimumusingize bami b’isi, hamwe n’amahanga yose, bikomangoma byo ku isi namwe bacamanza,

¹²basore namwe bakobwa b’inkumi, basaza namwe kandi rubyiruko!

¹³Bose nibasingize izina ry’Uhoraho, kuko ari ryo rihatse ayandi yose, n’ikuzo rye rigasumba ijuru n’isi.

¹⁴Ni we wateye ishema n’isheja umuryango we, bituma abayoboke be bamurata: ari bo Bayisraheli, imbaga y’ibyegera bye! Alleluya!