Read kinyarwanda Zaburi 16 Bible Online

Zaburi 16 - kinyarwanda bible

Zaburi 16

¹[18] Indirimbo ihebuje, iri mu zo bitirira Dawudi. Mana yanjye, unyiragirire kuko ari wowe buhungiro bwanjye.

²Uhoraho ndamubwiye nti «Ni wowe Mutegetsi wanjye, nta mahirwe yandi nagira atari wowe!»

³Ibigirwamana by’iyi si, bya binyamaboko byanshimishaga, birarushaho gutwara benshi umutima, bakabyohokaho.

⁴Ariko jyeweho sinzongera kubitura ibitambo biseswa, nta n’ubwo nzongera kubivuga mu mazina bibaho!

⁵Uhoraho, wowe munani wanjye n’umugabane wanjye, uko nzamera ni wowe ukuzi.

⁶Umugabane negukanye uranshimishije, umunani nahawe uranejereje.

⁷Ndashimira Uhoraho ungira inama, ndetse na nijoro umutima wanjye urabinyibutsa.

⁸Uhoraho mpora muzirikana ubudahwema, ubwo andi iruhande, sinteze guhungabana.

⁹Ni cyo gituma umutima wanjye unezerewe, amagara yanjye akamererwa neza, n’umubiri wanjye ukadendeza mu ituze;

¹⁰kuko utazantererana ngo mpere ikuzimu, kandi ukaba utazemera ko umuyoboke wawe agupfana.

¹¹Uzamenyesha inzira y’ubugingo; hafi yawe ni ho haba umunezero usendereye, iburyo bwawe hakaba umudabagiro udashira.