Read kinyarwanda Zaburi 17 Bible Online

Zaburi 17 - kinyarwanda bible

Zaburi 17

¹[19] Isengesho, riri mu yo bitirira Dawudi. Uhoraho, ndenganura! Nyumva, wite ku maganya yanjye; tega amatwi isengesho ryanjye, ridaturutse mu munwa ubeshya.

²Ba ari wowe uncira urubanza, ijisho ryawe rirebe aho ukuri guherereye!

³Wasuzumye umutima wanjye, ungenzura nijoro, ndetse urangerageza, ntiwagira ikibi unsangana: ururimi rwanjye narurinze gucumura.

⁴Kugira ngo ngenze nk’abantu bakurikiza amabwiriza yawe, nakomeje kunyura mu nzira wategetse,

⁵mpamya intambwe mu mayira yawe, ibirenge byanjye ntibyadandabirana.

⁶Mana yanjye, ndakwiyambaza, kuko unyumva; ntega amatwi, wumve ibyo nkubwira!

⁷Garagaza impuhwe zawe zahebuje, wowe ukiza abiringira ububasha bwawe, bagahonoka batyo abahagurukiye kubarwanya.

⁸Urandinde nk’imboni y’ijisho ryawe, umpishe mu gicucu cy’amababa yawe,

⁹kure y’abanyarugomo banyaze ibyanjye, n’abanzi gica bantangatanze impande zose.

¹⁰Umutima wabo wapfukiranywe n’ibinure, umunwa wabo ukavugana agasuzuguro.

¹¹Ngabo baransatiriye, none bamaze kungota; bampozaho ijisho bashaka uko bangarika ku butaka.

¹²Bameze nk’intare ikereye gushihagura, mbese nk’igisimba kibunze mu bwihisho.

¹³Uhoraho, haguruka! Ubatere, ubahashye! Inkota yawe ninkize umubisha!

¹⁴Uhoraho, ukuboko kwawe nikubameneshe, bave mu bantu, bacike mu bantu no ku isi. Uwo ni wo mugabane ubagenewe muri ubu bugingo! Inda yabo niyuzure ibyo wabazigamiye, n’abahungu babo babiboneho babyijute, basigarize n’abana babo bakiri ku ibere.

¹⁵Naho jyewe birakwiye ko nzareba uruhanga rwawe; ninkanguka, nzanyurwa n’uburanga bwawe.