Read kinyarwanda Zaburi 18 Bible Online

Zaburi 18 - kinyarwanda bible

Zaburi 18

¹[20] Igenewe umuririmbisha. Iri mu zo bitirira Dawudi, umugaragu w’Uhoraho. Yabwiye Uhoraho amagambo y’iyi ndirimbo igihe Uhoraho yari amaze kumukiza abanzi be bose bari bamumereye nabi, barimo Sawuli. Nuko aterura agira ati:

²Uhoraho, ndagukunda, wowe mbaraga zanjye!

³Uhoraho ni we rutare rwanjye, n’ibirindiro byanjye, akaba n’umurengezi wanjye. Ni Imana yanjye, n’urutare mpungiramo, akaba ingabo inkingira, n’intwaro nkesha gutsinda; ni na we buhungiro bwanjye budahangarwa.

⁴Natabaje Uhoraho, Nyakuberwa n’ibisingizo, maze mbasha gutsinda abanzi banjye.

⁵Ingoyi z’urupfu zari zandadiye, imivumba ya Beliyali[21] inkura umutima,

⁶ingoyi z’Ikuzimu zirangota, n’imitego y’urupfu ishandikwa mu nzira nyuramo.

⁷Nuko mu magorwa yanjye, ntakambira Uhoraho, ntakira Imana yanjye; na we rero, yumvira ijwi ryanjye mu Ngoro ye, imiborogo yanjye imugeraho.

⁸Nuko isi irahindagana, ihinda umushyitsi, ibitereko by’imisozi birakangarana, birahungabana kubera uburakari bwe.

⁹Mu mazuru ye hacucumuka umwotsi, mu kanwa ke havubuka umuriro w’inkongi, hasohoka n’amakara agurumana.

¹⁰Abogeka ijuru, maze aramanuka, aza arangwa n’igicu kibuditse mu nsi y’ibirenge bye.

¹¹Yicara ku gihu, maze araguruka, agenda ahorera mu nkubi y’umuyaga.

¹²Umwijima awugira ubwihisho bwe, yitwikira ibicu by’urucukirane: bimeze nk’amazi y’urwijiji.

¹³Akezezi kamubanza imbere, bya bicu biratamuruka, maze hagwa amahindu n’amakara yaka!

¹⁴Uhoraho ahindira mu ijuru nk’inkuba zesa, Usumba byose arangurura ijwi;

¹⁵arasa imyambi ye, ikwira hose, arekura imirabyo, maze isakara hose.

¹⁶Ubwo indiri y’inyanja irarangara, n’ibitereko by’isi biriyanika, kubera umuririmo wawe, Uhoraho, n’inkubi y’umuyaga uvubutse mu mazuru yawe.

¹⁷Nuko aho ari mu ijuru, arambura ukuboko aramfata, ankura mu mazi abira;

¹⁸ankiza atyo umwanzi wanjye ukomeye, n’abandwanyaga bandusha amaboko.

¹⁹Bari bantanze imbere ku munsi w’amakuba, ariko Uhoraho ambera ikiramiro;

²⁰arangobotora, anshyira ahantu hisanzuye, nuko arankiza, kuko ankunda.

²¹Uhoraho yangiriye ibikwiranye n’ubutungane bwanjye, ampembera ibikorwa byanjye bizira amakemwa.

²²Koko nakomeje inzira z’Uhoraho, nta bwo nigeze mba umuhemu ku Mana yanjye.

²³Amategeko yayo yose nayitayeho cyane, sinaca ukubiri n’amabwiriza yayo.

²⁴Nayibereye indakemwa, nirinda igicumuro icyo ari cyo cyose.

²⁵Nuko Uhoraho anyitura ibikwiranye n’ubutungane bwanjye, asanze ibikorwa byanjye bizira amakemwa.

²⁶Uw’indahemuka, umubera indahemuka, uw’indakemwa, ukamubera indakemwa.

²⁷Uw’intungane ukamubera intungane, naho uw’incabiranya, ukamurusha ubwenge.

²⁸Imbaga yasuzuguwe, ni wowe uyiha gutsinda, naho abibonabona ukabakoza isoni.

²⁹Uhoraho, ni wowe uncanira itara; Mana yanjye, ngaho mboneshereza mu mwijima ndimo.

³⁰Iyo turi kumwe, nsanganira igitero; iyo ndi kumwe n’Imana yanjye, nsimbuka inkike zihanitse.

³¹Inzira y’Imana ntihinyurwa na gato, ijambo ry’Uhoraho ntirikemangwa; ni we ngabo ikingira abamuhungiraho bose.

³²None se, ni nde Mana uretse Uhoraho? Ni nde Rutare twisunga usibye Imana yacu?

³³Iyo Mana ni yo intera imbaraga, ikantunganyiriza inzira nyuramo,

³⁴ikampa kunyaruka nk’impara, maze ikampagarika mu bitwa by’imisozi.

³⁵Ni yo intoza kurwana, maze amaboko yanjye akamenya gufora umuheto w’icyuma.

³⁶Nyagasani, umpa ingabo y’indatsimburwa, ukuboko kwawe kurandamira, unyitaho maze ukantera inkunga.

³⁷Intambwe zanjye uzagurira inzira, maze intege zanjye ntizidandabirane.

³⁸Ubu iyo nirukanye abanzi, ndabashyikira, maze simpindukire ntabatsembye.

³⁹Ndabacocagura, ntibashobore kubyutsa umutwe, bakarambarara mu nsi y’ibirenge byanjye.

⁴⁰Wanteye imbaraga zo kubatsinda, none abandwanyaga, ubu barampfukamiye.

⁴¹Abanzi banjye, watumye bavumwa barahunga, maze abari bampagurukiye ndabatsemba.

⁴²Baratabaza, ariko ntihagira ubavuna, batakira Uhoraho ariko ntiyabasubiza.

⁴³Nabahinduye nk’umukungugu utumurwa n’umuyaga, maze mbaribata nk’icyondo cyo mu nzira.

⁴⁴Undinda imyivumbagatanyo ya rubanda, ukangira umutware w’amahanga; none imbaga y’abantu ntari nzi ndayihatse.

⁴⁵Abahungu b’abanyamahanga bampatsweho, mvuga ijambo rimwe bakanyumvira.

⁴⁶Abanyamahanga bacitse intege, basohoka mu buhungiro bwabo badagadwa.

⁴⁷Uhoraho arakabaho! We Rutare nisunga, aragasingizwa! Imana nkesha umukiro niharirwe umutsindo,

⁴⁸iyo Mana yamporeye, ikanyegurira ibihugu ngo mbitegeke!

⁴⁹Wankijije abanzi banjye, ndetse umpa guhashya abansembuye, kandi unkiza abantu b’abanyarugomo.

⁵⁰Ni cyo gituma ngushimira, Uhoraho, rwagati mu mahanga, maze nkaririmba nshimagiza izina ryawe,

⁵¹mvuga nti «Agwiriza imitsindo umwami yimitse, agatonesha uwo yasize amavuta y’ubutore, ari we Dawudi n’abamukomokaho iteka ryose.»