Read kinyarwanda Zaburi 2 Bible Online

Zaburi 2 - kinyarwanda bible

Zaburi 2

¹[2] Ni iki gituma amahanga asakabaka, n’imiryango ikajujura ibitagira shinge?

²Abami b’isi bahagurukiye icyarimwe, n’abatware bishyira hamwe ngo barwanye Uhoraho n’Intore ye,

³bati «Nimucyo ducagagure ingoyi badushyizeho, tunage kure iminyururu batubohesheje!»

⁴Utetse ijabiro mu ijuru, we arabaseka, Uhoraho abaha urw’amenyo.

⁵Nuko ababwirana uburakari, ubukare bwe burabakangaranya,

⁶ati «Ni jye wiyimikiye umwami, kuri Siyoni, umusozi wanjye mutagatifu!»

⁷Reka ntangaze iteka Uhoraho yaciye : yarambwiye ati «Uri umwana wanjye, jyewe uyu munsi nakwibyariye!

⁸Binsabe, maze nguhe amahanga, abe umunani wawe, n’impera z’isi zibe ubukonde bwawe.

⁹Uzabamenaguza inkoni y’icyuma, ubajanjagure nk’urwabya rw’umubumbyi.»

¹⁰None rero, bami, nimwumvireho, namwe, bacamanza b’isi, mwisubireho!

¹¹Nimukeze Uhoraho, mumufitiye icyubahiro, mupfukamire umwana we mudagadwa;

¹²naho ubundi yarakara, mukarimbukira mu nzira, kuko uburakari bwe budatindiganya! Hahirwa abamuhungiraho bose.