Read kinyarwanda Zaburi 25 Bible Online

Zaburi 25 - kinyarwanda bible

Zaburi 25

¹[31] Iri mu zo bitirira Dawudi. Uhoraho, ni wowe umutima wanjye urangamiye.

²Ni wowe niringiye, Mana yanjye. Ndakwiragije, sinzakorwe n’ikimwaro, n’abanzi banjye ntibazanyishimeho!

³Ntihakagire n’umwe mu bakwiringira ukorwa n’ikimwaro, ahubwo abaguhemukaho nta mpamvu bazabe ari bo bakorwa n’isoni!

⁴Uhoraho, menyesha inzira zawe, untoze kugenda mu tuyira twawe.

⁵Nyobora mu kuri kwawe kandi ujye umbwiriza, kuko ari wowe Mana nkesha umukiro wose. Iminsi yose ni wowe niringira.

⁶Uhoraho, ibuka ineza n’urukundo wagaragaje kuva kera na kare.

⁷Ntiwite ku byaha n’amafuti nakoze nkiri muto, ahubwo unyiteho ukurikije impuhwe zawe, ugirire ubuntu bwawe, Uhoraho.

⁸Uhoraho agwa neza kandi ni indakemwa, ni cyo gituma abanyabyaha abagarura mu nzira nziza.

⁹Abiyoroshya abaganisha ku butungane, abacisha make akabatoza kunyura mu nzira ye.

¹⁰Amayira yose y’Uhoraho ni urukundo n’ubudahemuka, akabigirira abakomera ku isezerano rye no ku mategeko ye.

¹¹Girira izina ryawe, Uhoraho, maze umbabarire ibicumuro byanjye, kuko bikabije!

¹²Niba hari umuntu waba atinya Uhoraho, Uhoraho amwereka inzira agomba kunyura.

¹³Umutima we uhorana ihirwe, n’abamukomokaho bakazatunga igihugu.

¹⁴Ibanga ry’Uhoraho ribwirwa abamutinya, maze akabamenyesha isezerano rye.

¹⁵Amaso yanjye mpora nyahanze Uhoraho, kuko ari we ugobotora amaguru yanjye mu mutego.

¹⁶Nyerekezaho amaso yawe, ungirire imbabazi, kuko ndi inkeho nkaba n’umunyabyago.

¹⁷Akababaro mfite mu mutima ntikagira urugero, gira umvane mu magorwa ndimo.

¹⁸Reba akaga n’imiruho mfite, maze unkize ibyaha byanjye byose!

¹⁹Reba ukuntu abanzi banjye ari benshi cyane, n’ukuntu banyanga urunuka.

²⁰Rinda amagara yanjye, undokore, singakorwe n’ikimwaro ngufiteho ubuhungiro.

²¹Ubuziranenge n’umurava birankomeze, kuko ari wowe niringiye, Uhoraho.

²²Mana, gira ubohore Israheli, uyikure mu magorwa yayo yose!