Read kinyarwanda Zaburi 27 Bible Online

Zaburi 27 - kinyarwanda bible

Zaburi 27

¹[33] Iri mu zo bitirira Dawudi. Uhoraho ni urumuri rwanjye n’agakiza kanjye, ni nde wantera ubwoba? Uhoraho ni urugerero rw’ubugingo bwanjye, ni nde wankangaranya?

²Igihe abagiranabi bampagurukiye kugira ngo bandye mbona, abo banzi banjye bandwanya, ni bo ahubwo badandabirana, bakitura hasi!

³Kabone n’aho igitero cyose cyaza, kigashinga ingando kinyibasiye, umutima wanjye nta bwoba wagira na busa; n’aho intambara yarota, nakomeza kwizera.

⁴Ikintu kimwe nasabye Uhoraho, kandi nkaba ngikomeyeho, ni ukwiturira mu Ngoro y’Uhoraho, iminsi yose y’ukubaho kwanjye, kugira ngo mpore nirebera uburanga bw’Uhoraho, kandi nite ku Ngoro ye ntagatifu.

⁵Koko rero, igihe cy’amage, ampa aho nikinga mu nzu ye, akampisha mu bwihugiko bw’ihema rye, akanshyira ahantu hakomeye nk’urutare.

⁶None ubu ngubu umutwe wanjye uremaraye, ku buryo ndebera ku rutugu abanzi bankikije. Ngiye mu Ngoro ye nakereye gutura ibitambo, ndirimbire Uhoraho kandi mucurangire.

⁷Uhoraho, umva ijwi ryanjye, ndagutakira; gira ibambe, unsubize!

⁸Umutima wanjye wanyibukije ijambo ryawe, wowe wavuze uti «Nimushakashake uruhanga rwanjye!» None rero, Uhoraho, ni rwo nshakashaka,

⁹ntumpishe uruhanga rwawe! Wirakara ngo uhinde umuyoboke wawe, ni wowe muvunyi wanjye; ntunzinukwe ngo untererane, wowe Mana nkesha agakiza!

¹⁰N’aho data na mama bantererana, Uhoraho we yanyakira!

¹¹Uhoraho, nyereka inzira yawe, unyuze mu nzira iboneye, n’ubwo hariho abanyubikiriye.

¹²Ntungabize ababisha banjye bandwaye inzika; dore abashinjabinyoma banyibasiye, bariho barancumbira urugomo.

¹³Nyamara jye nizeye kuzabona ubugiraneza bw’Uhoraho, mu gihugu cy’abazima.

¹⁴Ihangane, wizigire Uhoraho, ukomeze umutima, ube intwari! Rwose, wiringire Uhoraho!