Read kinyarwanda Zaburi 28 Bible Online

Zaburi 28 - kinyarwanda bible

Zaburi 28

¹[34] Iri mu zo bitirira Dawudi Uhoraho, ndagutabaza, Rutare rwanjye, ntiwice amatwi! Kuko uramutse wicecekeye ntunyumve, nasigara ndi nk’indembe iraye iri bupfe!

²Umva ijwi ryanjye ritakamba igihe ngutakiye, n’igihe nerekeje ibiganza byanjye ku Ngoro yawe ntagatifu.

³Ntunkumbane n’abagomeramana, cyangwa hamwe n’abagizi ba nabi, bavugana iby’amahoro n’abaturanyi babo, nyamara mu mitima yabo haganje ububisha.

⁴Urabahe ibikwiranye n’imigirire yabo, mbese ukurikije ububisha bw’ibikorwa byabo; ubagenzereze ibikwiranye n’ibyo bakora, ubiture ikibakwiriye!

⁵Ubwo batitaye ku byo Uhoraho yakoze, ngo bahugukire ibikorwa by’amaboko ye, nabararike hasi ubutazabegura.

⁶Nihasingizwe Uhoraho, kuko yumvise ijwi ryanjye rimutakambira!

⁷Uhoraho ni we maboko yanjye n’ingabo nikingira, umutima wanjye waramwiringiye, maze arantabara. Ndasimbagizwa n’ibyishimo byansabye umutima, maze nkamushimira muririmbira.

⁸Uhoraho ni we mbaraga z’umuryango we, ni we buhungiro bukiza intore ye.

⁹Kiza umuryango wawe, uhe umugisha abo wagize imbata zawe; babere umushumba, uzahore ubaragiye iteka!