Read kinyarwanda Zaburi 32 Bible Online

Zaburi 32 - kinyarwanda bible

Zaburi 32

¹[38] Iri mu zo bitirira Dawudi. Ni inyigisho. Hahirwa umuntu wababariwe igicumuro cye, icyaha yakoze kikarenzwa amaso!

²Hahirwa umuntu Uhoraho adahamya icyaha yakoze, n’umutima we ntugire uburiganya.

³Igihe cyose nakomeje kukizinzika, umubiri wanjye wagiye ushonga, waciwe intege n’iminiho ya buri munsi,

⁴kuko ukuboko kwawe kwanshenguraga amanywa n’ijoro, ubuzima bwanjye bukayonga nk’ubukubiswe n’icyunzwe cyo mu cyi. (guceceka akanya gato)

⁵Ni bwo rero nkwirezeho icyaha cyanjye, sinazinzika amafuti yanjye. Naravuze nti «Ngiye kubwira Uhoraho ibicumuro byanjye», maze nawe untura umutwaro w’ibyaha byanjye. (guceceka akanya gato)

⁶Ni ko ugenzereza umuyoboke wese ukwiyambaje, igihe cyose aje akugana. N’aho amazi y’umwuzure yasendera, nta bwo ateze kumugeraho.

⁷Ni wowe bwugamo bwanjye, ukandinda amakuba, ugatuma mpanika indirimbo z’abarokowe.

⁸Maze ukambwira uti «Ngiye kukujijura, nkwereke inzira ukwiye gukurikira; nzaguhozaho ijisho, njye nkugira inama!

⁹Ntukamere nk’ifarasi cyangwa inyumbu bitagira ubwenge, bikenera umurunga n’umukoba ngo bicubye umurego, bityo ntuzagira icyo uba.»

¹⁰Abagiranabi bazigamiwe imibabaro myinshi, naho uwiringira Uhoraho, agasakazwaho impuhwe ze.

¹¹Ntungane, nimwizihirwe munezezwe n’Uhoraho, mudabagire mu byishimo, muvuze impundu mwese abanyamutima uboneye.