Read kinyarwanda Zaburi 34 Bible Online

Zaburi 34 - kinyarwanda bible

Zaburi 34

¹[40] Iri mu zo bitirira Dawudi. Ibivugwamo byerekeye igihe yihinduye nk’umusazi ahingutse imbere y’Abimeleki, maze undi yamwirukana, Dawudi akigendera.

²Nzashimira Uhoraho igihe cyose, ibisingizo bye bizahora ubudahwema mu munwa wanjye.

³Ishema mfite ryose ndikesha Uhoraho, ab’intamenyekana nibabyumve, maze bishime!

⁴Nimwogeze Uhoraho hamwe nanjye, twese hamwe turatire izina rye icyarimwe.

⁵Nashakashatse Uhoraho, aransubiza, nuko ankiza ibyankuraga umutima byose.

⁶Abamurangamira bahorana umucyo, mu maso habo ntiharangwa ikimwaro.

⁷Umunyabyago yaratabaje, Uhoraho aramwumva, maze amuzahura mu magorwa ye yose.

⁸Umumalayika w’Uhoraho aca ingando hafi y’abamutinya, akabagoboka.

⁹Nimushishoze maze mwumve ukuntu Uhoraho anogera umutima; hahirwa umuntu abereye ubuhungiro!

¹⁰Nimutinye Uhoraho, mwebwe abo yitoreye, kuko abamutinya nta cyo babura.

¹¹Abakire bageza aho bakena bagasonza, naho abashakashaka Uhoraho nta cyo babura.

¹²Bana, nimuze muntege amatwi, mureke mbigishe uko mutinya Uhoraho.

¹³Ari hehe umuntu ukunda ubugingo, akifuza guhirwa mu buzima bwe bwose?

¹⁴Ururimi rwawe rero urarurinde ikibi, n’umunwa wawe uwurinde amazimwe.

¹⁵Zibukira ikibi, ukore ikiri cyiza; shaka amahoro, abe ari yo uharanira.

¹⁶Amaso y’Uhoraho ayahoza ku bantu b’intungane, amatwi ye agahora yitaye ku maganya yabo.

¹⁷Uhoraho ashyamirana n’abagiranabi, kugira ngo azimanganye ku isi icyatuma babibuka.

¹⁸Intungane ziratabaza, Uhoraho akazumva, maze akazikiza amagorwa yazo yose.

¹⁹Uhoraho aba hafi y’abafite umutima washengutse, akaramira abafite umutima wihebye.

²⁰Intungane igira ibyago byinshi, ariko buri gihe Uhoraho akabiyikiza.

²¹Arinda umubiri wayo wose, ntihagire igufwa ryayo na rimwe rivunika.

²²Nyamara icyago gihitana umugome, abanga intungane bagahabwa igihano.

²³Uhoraho arengera amagara y’abayoboke be, kandi nta n’umwe mu bamuhungiraho uzahabwa igihano.