Read kinyarwanda Zaburi 35 Bible Online

Zaburi 35 - kinyarwanda bible

Zaburi 35

¹[41] Iri mu zo bitirira Dawudi. Uhoraho, nawe shinja ibyaha ababindega, urwanye abihaye kundwanya.

²Fata ingabo yawe n’ingofero y’intamenwa, maze uhaguruke uze untabare.

³Kura icumu mu ntagara, wimire abanyirukana, maze umpumurize umbwira uti «Ni jye ukurengera!»

⁴Abahigira amagara yanjye nibakorwe n’isoni, maze bamwarwe! Abagambiriye kungirira nabi, nibasubire inyuma bamanjirwe!

⁵Bazamere nk’umurama mu muyaga, umunsi umumalayika w’Uhoraho azabahinda.

⁶Inzira bacamo izacure umwijima kandi inyerere, umunsi umumalayika w’Uhoraho azaba abirukana!

⁷Banteze umutego banziza ubusa, bancukurira urwobo nta mpamvu.

⁸Icyorezo gikaze nikibatungure, bafatirwe mu mutego bateze ubwabo, maze urwo rwobo babe ari bo barugwamo.

⁹Ubwo rero nzasabagizwa n’ibyishimo nkesha Uhoraho, mbyine nishimira ko yankijije.

¹⁰Maze jyewe, uko nakabaye, nzavuge nti «Uhoraho, ni nde wamera nkawe? Utabara insuzugurwa, ukayikiza uwayirushaga amaboko, insuzugurwa n’umukene ukabamururaho abambuzi.»

¹¹Abashinjabinyoma bampagurukiye, barampata ibibazo ku bintu ntazi.

¹²Ineza mbagirira bayitura inabi, none nsigaye ndi inkeho.

¹³Nyamara, iyo babaga barwaye, jyewe nambaraga ikigunira, nkibabaza cyane ngasiba kurya, ngahora nsenga mbasabira.

¹⁴Nahoraga nshyashyana nk’aho ari incuti cyangwa umuvandimwe, ngahora nijimye kandi nacitse urukendero nk’aho ari mama wapfuye.

¹⁵Ariko naraguye, bo bakoranira kunkina ku mubyimba, ndetse n’abavantara ntazi barahurura, nuko baranshwanyaguza nta mbabazi.

¹⁶Abo bagomeramana b’abashinyaguzi, bangota bampekenyera amenyo.

¹⁷Nyagasani, ibyo uzabyihanganira kugeza ryari? Gira warure amagara yanjye muri icyo cyago, unkize ibyo byana by’intare,

¹⁸maze nzagushimirire mu ikoraniro rigari, ngusingirize hagati y’imbaga y’abantu.

¹⁹Abanyanga ku maherere ntukareke banyigambaho,, n’abantoteza nta mpamvu ntibakanyicanireho ijisho.

²⁰Nta jambo ry’amahoro ribarangwaho, icyabo ni uguhimba ibirego byo gusebya abanyetuze bari mu gihugu.

²¹Baranyasamira bamvuga nabi ngo «Dore dore! Turamwiboneye!»

²²Uhoraho, urabona nawe ko udakwiye kwicecekera! Nyagasani, wiguma kure yanjye!

²³Kanguka, uhagurukire kundenganura; umburanire, wowe Mana yanjye n’Umutegetsi wanjye!

²⁴Uhoraho Mana yanjye, ndenganura ukurikije ubutabera bwawe, maze woye gutuma banyigambaho!

²⁵Ntureke bavuga ngo «mama weee! Turamutera itama rimwe!» Ntibakabone n’uko bavuga ngo «Turamushyikiriye!»

²⁶Bose icyarimwe nibakorwe n’ikimwaro, bo bishimiraga ibyago byanjye! Abanyigambagaho nibakorwe n’isoni, maze bamwazwe!

²⁷Naho abanyifurizaga gutsinda urubanza nibavuze impundu, bavuge ubudahwema bati «Uhoraho aratsinze, we washakiye umuyoboke we ihirwe.»

²⁸Bityo ururimi rwanjye ruzamamaze ubutabera bwawe, ndirimbe ibisingizo byawe iminsi yose.