Read kinyarwanda Zaburi 37 Bible Online

Zaburi 37 - kinyarwanda bible

Zaburi 37

¹[43] Iri mu zo bitirira Dawudi. Ntugahangayikishwe n’abagiranabi, cyangwa ngo ugirire ishyari abahendanyi,

²kuko bagwangara bwangu nk’ibyatsi, bakuma nk’igisambu cyari gitohagiye.

³Iringire Uhoraho, kandi ugenze neza, kugira ngo ugume mu gihugu, kandi uhagirire amahoro.

⁴Nezezwa n’Uhoraho, na we azaguha icyo umutima wawe wifuza.

⁵Yoboka inzira igana Uhoraho, umwiringire: na we azakuzirikana,

⁶maze ubutungane bwawe abugaragaze nk’umuseke ukebye, n’ubutabera bwawe, bumere nk’amanywa y’ihangu.

⁷Gumana ituze imbere y’Uhoraho, umwiringire, ntugahangayikishwe n’uwahiriwe na byose, n’utunzwe n’amayeri ntakakubabaze.

⁸Reka uburakari, wime urwaho umujinya, woye kwijujuta, kuko byakugwa nabi.

⁹Koko rero, abagiranabi bazagera aho barimburwe, naho abiringira Uhoraho batunge igihugu.

¹⁰Hasigaye igihe gito, maze umugiranabi akavaho; uzamushakira aho yari atuye, usange atakiharangwa.

¹¹Naho abakene bazatunga igihugu, bagire amahoro asagambye.

¹²Umugiranabi ahora acura inama yibasiye intungane, maze akayihekenyera amenyo.

¹³Ariko Nyagasani aramugaya, kuko aba aruzi umunsi we wegereje.

¹⁴Abagiranabi bakuye inkota, bafora n’imiheto, kugira ngo bice umukene n’indushyi, banasogote intungane.

¹⁵Nyamara inkota bafite izabagarukana ibahuranye umutima, n’imiheto yabo izavunagurike.

¹⁶Uduke intungane itunze turayihira kurusha ibyinshi by’abagiranabi,

¹⁷kuko amaboko y’abagiranabi azakenyagurika, ariko Uhoraho agashyigikira intungane.

¹⁸Uhoraho ateganya iminsi y’ab’indakemwa, n’umugabane wabo uzahoraho ubuziraherezo.

¹⁹Ntibazakorwa n’ikimwaro igihe cy’amage, n’igihe cy’inzara bazarya bahage.

²⁰Naho abagiranabi bazarimbuka, abanzi b’Uhoraho bamere nk’ibyatsi byo mu gisambu, bayoyoke nk’umwotsi.

²¹Umugiranabi asaba inguzanyo, ariko ntiyishyure, naho intungane ikagira ibambe, igatanga ku buntu.

²²Abo Uhoraho yahaye umugisha bazatunga igihugu, naho abo avumye barimbukire gushira.

²³Uhoraho ni we utuma umuntu ashingura intambwe, maze inzira anyuzemo ikamuhira;

²⁴iyo atsikiye ntatembagara, kuko Uhoraho ari we umufashe ukuboko.

²⁵Kuva mu buto bwanjye kugeza na n’ubu nshaje, sinigeze mbona intungane itereranwa, cyangwa urubyaro rwayo rusabiriza ibyo kurya.

²⁶Iteka intungane igira ibambe, igatanga inguzanyo, n’urubyaro rwayo rukagira umugisha.

²⁷Irinde ikibi, maze ukore icyiza, ni bwo uzagira aho utura ubuziraherezo;

²⁸kuko Uhoraho akunda ibitunganye, kandi ntatererane abayoboke be. Naho abagiranabi bazatsembwa bidasubirwaho, inyoko y’abagiranabi igende buheriheri.

²⁹Intungane zo zizatunga igihugu, zigiture ubuziraherezo.

³⁰Umunwa w’intungane uhora uvuga iby’ubuhanga, ururimi rwayo rukavuga ibitunganye.

³¹Amategeko y’Imana yayo iyahoza ku mutima, ikagenda itikanga icyayihutaza.

³²Abagiranabi bahora bagenza intungane, bagashakashaka uko bayica;

³³ariko Uhoraho ntayibegurire, ntareke itsindwa mu rubanza.

³⁴Iringire Uhoraho kandi ukomeze ukurikire inzira ye, azagushyira ejuru kugeza ubwo utunga igihugu, maze uzibonere ukuntu abagiranabi batsiratsizwa.

³⁵Niboneye uko umugiranabi akoresha ubushobozi afite, mbona n’uko atumbagira nk’isederi yo muri Libani,

³⁶ariko hanyuma nongeye guhita, nsanga yarazimiye, mushakashatse, sinongera kumubona.

³⁷Nyamara irebere umuntu w’umuziranenge, wirebere umuntu w’inyangamugayo: koko umuntu w’amahoro asiga imbuto.

³⁸Abigometse bose bazazimirira icyarimwe, n’inyoko y’abagiranabi icike burundu.

³⁹Agakiza k’intungane gaturuka kuri Uhoraho, ni we buhungiro bwazo igihe cy’amakuba.

⁴⁰Uhoraho arabafasha, akabarokora, akabakiza abagiranabi, maze akabarengera, kuko ari we bahungiyeho.