Read kinyarwanda Zaburi 38 Bible Online

Zaburi 38 - kinyarwanda bible

Zaburi 38

¹[44] Ni zaburi iri mu zo bitirira Dawudi. Yaririmbwe n’ugira ngo Imana imwibuke.

²Uhoraho, umpane nta mujinya ubigiranye, unkosore nta mwaga ufite.

³Imyambi yawe yampuriyeho, ikiganza cyawe kiranshikamiye.

⁴Kubera uburakari bwawe, umubiri wanjye nta ho ukiri mutaraga, ku mpamvu y’icyaha nakoze, nta gufwa na rimwe rikiri rizima.

⁵Koko rero ibicumuro byanjye birampfukiriye, birandemereye nk’umutwaro w’indashyigurwa.

⁶Ibisebe byanjye biranuka bikaninda amashyira, ibyo kandi bitewe n’ubupfayongo bwanjye.

⁷Dore nahetamye umugongo, nkagenda nandara; umunsi wose mpora nijimye,

⁸kubera ko ibyaziha byanjye bihinda umuriro, none nta rugingo rukiri ruzima mu mubiri wanjye.

⁹Naguye ibinya kandi ndahuhutwa; ndagongera, ngacura imiborogo.

¹⁰Nyagasani, ibyifuzo byanjye byose ni wowe ubizi, n’amaganya yanjye yose ntuyayobewe.

¹¹Umutima wanjye uradihaguza, intege zanshizemo, ndetse n’amaso yanjye nta bwo agihunyeza.

¹²Incuti na bagenzi banjye bahunga ibisebe byanjye, na benewacu bakampa akato.

¹³Abahigira amagara yanjye banteze imitego, abanyifuriza icyago baramvuga amagambo mabi, umunsi wose bakanamanama bangambanira.

¹⁴Naho jyewe, nta cyo ncyumva, boshye igipfamatwi; meze nk’ikiragi kitabasha kuvuga,

¹⁵cyangwa se nk’umuntu utumva, kandi utabasha kugira icyo asubiza.

¹⁶Uhoraho, ni wowe nizeye, Nyagasani Mana yanjye, ni wowe uzamvuganira!

¹⁷Naravuze nti «Abashaka kunkwena igihe mputaye, ntibazatsinde ngo bankine ku mubyimba».

¹⁸None dore ngiye kubandagara, ububabare bwanjye ntibukimpa agahenge.

¹⁹Rwose, nemeye igicumuro cyanjye, kandi mpagaritse umutima kubera icyaha nakoze.

²⁰Abanyangira ubusa ntibabarika, n’abanzira nta mpamvu ni ishyano ryose.

²¹Ineza mbagiriye bayitura inabi, naharanira gukora neza bakabimpora.

²²None rero, Uhoraho, ntuntererane na rimwe, Mana yanjye, ntube kure yanjye!

²³Gira bwangu untabare, Nyagasani, mukiza wanjye!