Read kinyarwanda Zaburi 40 Bible Online

Zaburi 40 - kinyarwanda bible

Zaburi 40

¹[46] Igenewe umuririmbisha. Ni zaburi iri mu zo bitirira Dawudi.

²Niringiye Uhoraho, mwiringira ntatezuka; nuko anyitaho maze yumva amaganya yanjye.

³Ankura mu rwobo rukanganye, ansayura mu nzarwe ndende; arampagurutsa, ampagarika ku rutare, ampa gushinga ibirindiro.

⁴Yampaye guhanika indirimbo nshya, ndirimbira Imana yacu ibisingizo biyikwiye. Benshi bazabibona bayigirire igitinyiro, maze bakurizeho kwiringira Uhoraho.

⁵Hahirwa umuntu wiringira Uhoraho, ntashyire hamwe n’abagomeramana, cyangwa ngo ajye mu ishyaka ry’abanyabinyoma!

⁶Uhoraho Mana yacu, wadukoreye ibintu byinshi cyane: udutegurira imigambi, utugaragariza n’ibitangaza, rwose, nta we twakunganya! Ni byinshi cyane, nta wabona uko abivuga.

⁷Ntiwifuje ibitambo cyangwa amaturo, ahubwo wanzibuye amatwi ngo numve; ntiwigombye igitambo gitwikwa cyangwa icy’impongano,

⁸ni yo mpamvu navuze nti «Ngaha ndaje! Mu muzingo w’igitabo[47] handitswemo icyo unshakaho.

⁹Mana yanjye, niyemeje gukora ibigushimisha, maze amategeko yawe ajye ampora ku mutima!»

¹⁰Namamaje ubutungane bwawe mu ikoraniro rigari; ibyo usanzwe ubizi, Uhoraho, sinigeze mbumba umunwa ngo nceceke.

¹¹Ubutungane bwawe sinabuhishe mu mutima wanjye, namamaje ubudahemuka bwawe n’umukiro uguturukaho, sinahishahisha ineza n’ukuri byawe imbere y’ikoraniro rigari.

¹²Nawe rero, Uhoraho, ntunyime imbabazi zawe, ineza n’ukuri byawe bizandagire ubudahwema!

¹³Amakuba atagira ingano aranyugarije, ibicumuro byanjye birampinduka, bikantera guhuma amaso; birusha ubwinshi umusatsi undi ku mutwe, bigatuma umutima wanjye ucika urukendero.

¹⁴Uhoraho, gira impuhwe maze umbohore! Uhoraho, banguka untabare!

¹⁵Abashaka kumvutsa ubugingo bose nibakorwe n’ikimwaro, bamanjirwe! Abanyifuriza icyago bose nibasubire inyuma bafite ipfunwe!

¹⁶Abanyigambaho bavuga ngo «Si we wabona!» nibahahamuke, bagende bishwe n’ikimwaro.

¹⁷Naho abagushakashaka bose nibahimbarwe bakwishimira! Abakunda umukiro wawe nibavuge ubudahwema, bati «Uhoraho ni igihangange!»

¹⁸Jyeweho, ndi umukene n’indushyi, ariko Uhoraho aranzirikana. Koko, ni wowe muvunyi n’umukiza wanjye; Mana yanjye, ntutinde kungoboka!