Read kinyarwanda Zaburi 42 Bible Online

Zaburi 42 - kinyarwanda bible

Zaburi 42

¹[49] Igenewe umuririmbisha. Ni umuvugo w’abahungu ba Kore.

²Uko impara yahagira ishaka amazi afutse, ni ko umutima wanjye ugufitiye inyota, Mana yanjye.

³Umutima wanjye ufite inyota y’Imana, Imana Nyir’ubuzima; mbese nzajya ryari kureba uruhanga rw’Imana?

⁴Nsigaye ntunzwe no kurira umunsi n’ijoro, ari na ko bambwira ngo «Imana yawe iba hehe?»

⁵Ndabyibuka, bigatuma nsuhuza umutima, uko najyaniranaga n’inteko z’abantu, nyoboye umutambagiro ugana Ingoro y’Imana, mu rwamu rw’impundu n’ibisingizo, by’imbaga yakereye ibirori.

⁶Mbe mutima wanjye, ni iki kiguciye intege, kandi ukangiriramo amaganya? Izere Imana, kuko nzongera kuyisingiza, yo mukiza wanjye n’Imana yanjye!

⁷Umutima wanjye waguye agacuho, Mana yanjye; ni cyo gituma nzirikana ka gasozi gato, kari hagati y’imisozi ya Yorudani n’ibitwa bya Herimoni.

⁸Imivumba y’amazi magari, ngiyo irasukiranya, ikurikiwe n’urusaku rw’insumo ziruruma; maze imivu n’imihengeri bikantemba hejuru.

⁹Ku manywa, Uhoraho agaba ineza ye, nijoro sintuze kumuririmba, bityo ngasenga Imana nkesha ubuzima.

¹⁰Ndashaka kubwira Imana, yo rutare rwanjye, nti «Kuki wanyibagiwe? Kuki nagomba kugenda nijimye, umwanzi ansumbirije ?»

¹¹Dore ingingo zanjye zatagaranye, abanzi barantuka buri gihe, bambaza ubudatuza ngo «Imana yawe iba hehe?»

¹²Mbe mutima wanjye, ni iki kiguciye intege, kandi ukangiriramo amaganya? Izere Imana, kuko nzongera kuyisingiza, yo mukiza wanjye n’Imana yanjye.