Read kinyarwanda Zaburi 44 Bible Online

Zaburi 44 - kinyarwanda bible

Zaburi 44

¹[51] Igenewe umuririmbisha. Ni umuvugo w’abahungu ba Kore.

²Mana yacu, twarabyiyumviye n’amatwi yacu, ba sogokuru barabitubwiye, badutekerereza ibyo wakoze kera mu gihe cyabo.

³Wakoresheje ukuboko kwawe, unyaga amahanga, ugira ngo ubabonere aho batura, kandi uburabuza ibihugu, ugira ngo ubabonere aho bisanzurira.

⁴Inkota zabo si zo bakesheje kwigarurira igihugu, imbaraga zabo si zo zabahaye gutsinda; ahubwo ni indyo yawe bwite, ukuboko kwawe, n’urumuri rw’uruhanga rwawe, kuko wabikundiye.

⁵Mana yanjye n’umwami wanjye, ni wowe watumaga bene Yakobo batsinda.

⁶Ku bwawe, twashoboye gutikura ababisha bacu, ku bw’izina ryawe turibata abaduteraga.

⁷Umuheto wanjye si wo niringiraga, inkota yanjye si yo yampaga gutsinda,

⁸ahubwo ni wowe wadukijije ababisha bacu, maze abatwanga ubakoza isoni.

⁹Nuko iminsi yose tukaririmba ibisingizo by’Imana, tugashimira izina ryawe ubudahwema. (guceceka akanya gato)

¹⁰None ubu waradutaye, bituma dusuzugurika; ntugitabarana n’ingabo zacu.

¹¹Utuma duhunga abaturwanya, maze ababisha bakadutwara iminyago uko bashaka.

¹²Usigaye udutanga nk’intama zigenewe kubagwa, maze ukadutatanyiriza mu mahanga.

¹³Umuryango wawe uwutanga ku giciro kigayitse, ntugire inyungu ubona muri ubwo buguzi.

¹⁴Utugabiza ibitutsi by’abaturanyi bacu, abo tubana bakadukwena, bakaduhindura urw’amenyo.

¹⁵Watugize iciro ry’imigani mu mahanga, mu bihugu byose bakatuzunguriza umutwe.

¹⁶Umunsi wose mbona uko nataye agaciro, maze ikimwaro kikansaba mu maso,

¹⁷ku mpamvu y’urusaku rw’abanyigambaho, ari na ko batuka Imana; nuko nkabura aho nkwirwa imbere y’umwanzi unyihimura.

¹⁸Ibyo byose byatubayeho kandi tutari twakwibagiwe, ngo duce ku masezerano twagiranye nawe;

¹⁹umutima wacu ntiwari waciye ukubiri na yo, n’intambwe zacu ntizari zateshutse inzira yawe,

²⁰ngo bibe byatuma uducocagurira mu gihugu cy’imbwebwe, maze ukatworosa igicucu cy’urupfu.

²¹Mbese iyo tuba twaribagiwe izina ry’Imana yacu, tugategera ibiganza imana z’inyamahanga,

²²Imana ntiba yarabibonye, yo imenya amabanga ari mu mutima wa buri muntu?

²³Nyamara baratwica ubudahwema ari wowe batuziza, bakatugenzereza nk’intama zigenewe ibagiro!

²⁴Kanguka, Nyagasani, kuki wisinziriye? Baduka, woye kudutererana burundu!

²⁵Ni kuki ugumya guhisha uruhanga rwawe, maze ukirengagiza akaga n’ubwagirizwe turimo?

²⁶Koko amagara yacu aragaragurika mu mukungugu, inda yacu yumanye n’ubutaka.

²⁷Haguruka, uze udutabare! Girira impuhwe zawe, utugobotore!