Read kinyarwanda Zaburi 45 Bible Online

Zaburi 45 - kinyarwanda bible

Zaburi 45

¹[52] Igenewe umuririmbisha, ikaririmbwa bakurikije injyana y’iyitwa «Ihogoza». Ni umuvugo w’abahungu ba Kore, ikaba indirimbo y’urukundo.

²Umutima wanjye uratemba amagambo ateye ubwuzu, reka mvuge ibisigo nahimbiye umwami; ururimi rwanjye rurabe nk’ikaramu y’umwanditsi w’umuhanga!

³Uri mwiza kurusha bene muntu bose, igikundiro cyisesuye ku minwa yawe; ni cyo gituma Imana yaguhaye umugisha uzahoraho.

⁴Ambara inkota yawe ku itako, wa ntwari we, maze ugendane ishema n’ubukaka!

⁵Wurire ifarasi yawe, maze uganze, urwanira ukuri, ubugwaneza n’ubutabera!

⁶Indyo yawe izaca ibintu, imyambi yawe iratyaye, ingabo ziguteye uzazihindura imirara; bityo abanzi b’umwami ubahuranye umutima.

⁷Intebe yawe y’ubwami iragahoraho iteka, mbese nk’iy’Imana ubwayo, n’inkoni yawe ya cyami irabe iy’ubutabera!

⁸Ukunda ubutungane, ukanga ubugiranabi; ni cyo cyatumye Imana, ari yo Mana yawe, yaragusize amavuta y’ubutore kandi y’ibyishimo, maze iguhitamo muri bagenzi bawe.

⁹Imyambaro yawe irahumura imibavu ya manemane, ishangi, n’ububani; ukanacurangirwa inanga nziza mu ngoro itatse amahembe y’inzovu.

¹⁰Abakobwa b’abami babarirwa mu nkoramutima zawe, n’umwamikazi aguhagaze iburyo, yambaye imyenda itatse zahabu y’i Ofiri.

¹¹Umva mukobwa, itegereze maze utege amatwi: ibagirwa igihugu cyawe n’umuryango uvukamo,

¹²maze umwami abenguke uburanga bwawe! Ni we mutegetsi wawe: emera upfukame imbere ye!

¹³Nuko rero, mwari w’i Tiri, abakungu bo muri rubanda bazakugana bitwaje amaturo ngo bagushakeho ubutoni.

¹⁴Umukobwa w’umwami, nguyu atungutse arabagirana, yarimbanye umwambaro utatse zahabu!

¹⁵Bamuhingutsa imbere y’umwami bamutatse, ahagerana n’abakobwa, bagenzi be bamuherekeje;

¹⁶Babinjiza mu ngoro y’ibwami, batambagirana ibyishimo n’ubwuzu.

¹⁷Abahungu bawe ni bo bazasimbura ba sogokuruza, uzabagire ibikomangoma ku isi yose!

¹⁸Maze nzarate izina ryawe mu mbyaro zose, n’imiryango izagusingize ubuziraherezo.